ИНОЕ   ПОСЛЕДОВАНИЕ   МОЛЕБНАГО   ПЕНИЯ   О   УМНОЖЕНИИ   ЛЮБВИ   В   СОЕДИНЕНИИ   С   ПАРАКЛИСОМ ПРЕСВЯТОЙ   БОГОРОДИЦЕ

По обычном начале псалом 142.

Ектения великая:

Миром Господу помолимся.

О свышнем мире:

О мире всего мира:

О еже очистити нас от грехов и беззаконий наших, изсушающих в нас любовь к Богу и к ближним, водрузити же оную силою, действом и благодатию Пресвятаго Своего Духа и вкоренити в сердца всех нас, прилежно Господу помолимся.

О еже всеяти в нас и благодатию Пресвятаго Своего Духа вкоренити новую Своего Новаго Завета заповедь любити друг друга и не себе угождати, но о славе Божией и о созидании ближняго всегда ревновати, Господу помолимся.

О еже искоренити в нас ненависть, зависть, злобу и все прочие страсти, братолюбие разрушающия, и нелицемерную любовь всеяти, усердно Господу помолимся.

О еже теплую любовь к Богу и к ближним в нас благодатию Пресвятаго Своего Духа распалити, и тою все страсти душ и телес наших из корене сожещи, Господу помолимся.

О еже искоренити в нас страсть самолюбия, добродетель же братолюбия силою Пресвятаго Своего Духа вкоренити, сердцем сокрушенным Господу помолимся.

О еже не любити нам мира и всего яже в мире, но истинною любовию Бога и славу Его, и пользу и спасение ближних возлюбити, и на небеси уготованная благая присно зрети, и искати сих вседушно, Господу помолимся.

О еже принудити нас силою, действом и благодатию Пресвятаго Своего Духа не точию друзей и братий наших, но и врагов истинно любити, и ненавидящим нас благотворити, о них молитися, и о спасении их тщание имети, Господу помолимся.

О еже себе внегда внимати, себя окаявати и своя согрешения всегда зрети, себя пред Богом и пред всеми смиряти, брата никогдаже осуждати, но яко самаго себя того любити, силою, действом и благодатию Пресвятаго Духа, Господу помолимся.

О еже поревновати нам древних христиан к Богу и к братиям горящей любви, и наследниками и преемниками тех быти, не образом точию, но детельною истиною, силою, действом и благодатию Пресвятаго Духа, Господу помолимся.

О еже в правоверии непозыблемых, в мире и союзе любви горящих, и во всех добродетелях преспевающих нас всегда сохранити и от всех душетленных страстей невредимыми соблюсти, силою, действом и благодатию Пресвятаго Духа, Господу помолимся.

На Бог Господь:

Тропарь, глас 4:

Союзом любви апостолов Твоих связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава:

Тропарь Богородице, глас 4:

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

И ныне:

Не умолчим никогда, Богородице, силы Твоя глаголати, недостойнии, аще бо Ты не бы предстояла молящи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе, Твоя бо рабы спасаеши присно от всяких лютых.

Псалом 50.

И поем канон Богородице, глас 8, без ирмосов.

Песнь 1

Ирмос: Воду прошед:

Припев: Пресвятая Богородице, спаси нас.

Многими содержим напастьми, к Тебе прибегаю, спасения иский: о, Мати Слова и Дево, от тяжких и лютых мя спаси.

Пресвятая Богородице, спаси нас.

Страстей мя смущают прилоги, многаго уныния исполняющи мою душу, умири, Отроковице, тишиною Сына и Бога Твоего, Всенепорочная.

Слава: Спаса родшую Тя и Бога, молю, Дево, да избавлюся от лютых: к Тебе бо ныне прибегая, простираю и душу и помышление.

И ныне: Недугующа телом и душею, посещения Божественнаго и промышления от Тебе сподоби, едина Богомати, яко благая, Благаго же Родительнице.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко к нерушимей стене и предстательству.

Призри благосердием, Всепетая Богородице, на мои лютыя скорби телесныя, и исцели души моея болезнь.

Песнь 3

Ирмос: Небеснаго круга:

Пресвятая Богородице, спаси нас.

Предстательство и покров жизни моея полагаю Тя, Богородительнице Дево: Ты мя направи ко пристанищу Твоему, благих виновна, верных утверждение, едина Всепетая.

Пресвятая Богородице, спаси нас.

Молю, Дево, душевное смущение и печали моея бурю разорити: Ты бо, Богоневестная, начальника тишины Христа родила еси, едина Пречистая.

Слава: Благодетеля рождши добрых виновнаго, благодеяния богатство всем источи, вся бо можеши, яко сильнаго в крепости Христа рождши, Богоблаженная.

И ныне: Лютыми недуги и болезненными страстьми истязаему, Дево, Ты ми помози: исцелений бо неоскудное Тя знаю сокровище, Пренепорочная, неиждиваемое.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри, благосердием, всепетая Богородице, на мои лютыя скорби телесныя и исцели души моея болезнь.

Ектения сугубая:

Помилуй нас, Боже:

Господи Боже наш, милостивно яко Благ призри на изсохшую в любви землю сердца нашего, тернием ненависти, самолюбия и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси сию, да будет плодоносна и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей и многообразных лукавств и лицемерия искоренение, прилежно яко всех благ Дателя молим, скоро услыши и человеколюбно помилуй.

Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действительно в душах и в сердцах наших, да николиже о своей токмо пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.

Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, любити ближних наших, яко самих себя даровавый нам, Владыко. Сам подвигни нас делом сия исполняти, да Тебе Спасу нашему угождающе и о спасении ближних наших ревнующе, обетованная Твоя получим благая, яко Владыце и Спасу нашему, прилежно припадающе, молимся, скоро услыши и помилуй.

Да совершени в любви к Тебе, Боже наш, будем, к ближним нелицемерную любовь иметь подвигни нас Твоего Духа благодатию, Владыко. К Тебе бо любовь имети мняйся, брата же своего ненавидяй, ложь есть и во тьме ходит. Тем же, Милостиве, любовию к Тебе и к братии распали души и сердца наши молимся, яко Милостив скоро услыши и яко Щедр помилуй.

Возглас: Яко милостив:

Кондак Богородицы, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Седален, глас 2:

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.

Песнь 4

Ирмос: Услышах, Господи:

Пресвятая Богородице, спаси нас.

Страстей моих смущение и бурю моих прегрешений утиши, Богоневестная, кормчаго рождшая Господа.

Пресвятая Богородице, спаси нас.

Милосердия Твоего бездну призывающу подаждь ми, Благосердаго рождая и Спаса всех поющих Тя.

Пресвятая Богородице, спаси нас.

Наслаждающеся, Пречистая, Твоих дарований, благодарственное воспеваем пение, ведуще Тя Богоматерь.

Слава: На одре болезни моея и немощи низлежащу ми, благолюбива, помози, Богородице, едина Приснодево.

И ныне: Надежду и утверждение и спасения стену недвижиму имуще Тя, Всепетая, неудобства всякаго избавляемся.

Катавасия: Спаси от бед рабов Твоих, Богородице, яко вси по Бозе в Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 5

Ирмос: Просвети нас:

Пресвятая Богородице, спаси нас.

Исполни, Чистая, веселия сердце мое, Твою нетленную дающи радость, веселия родшая Виновнаго.

Пресвятая Богородице, спаси нас,

Избави нас от бед, Богородице чистая, вечное родши избавление, и мир, всяк ум превосходящий.

Слава: Разреши мглу прегрешений моих, Богоневесто, просвещением Твоея светлости, Свет родшая Божественный и превечный.

И ныне: Исцели, Чистая, души моея неможение, посещения Твоего сподобльши, и здравие молитвами Твоими подаждь ми.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 6

Ирмос: Молитву пролию ко Господу:

Пресвятая Богородице, спаси нас.

Господа и Сына Твоего, Своею вольною смертию от смерти и тления спасшаго наше естество, объято бывшее тлением и смертию, моли, Дево, да от злодействия врагов избавит мя.

Пресвятая Богородице, спаси нас.

Предстательницу Тя жизни вем и хранительницу тверду, Дево, и напастей решащу молвы, и нападения бесов отгоняющу, и молюся всегда от растлевающих страстей моих избавити мя.

Слава: Яко стену прибежища стяжахом, и душ всесовершенное спасение, и утешение в скорбех, Отроковице, и просвещением Твоим присно радуемся: о, Владычице и ныне нас от страстей и бед спаси.

И ныне: На одре ныне немощствуяй лежу, и несть исцеления плоти моей; но Бога и Спаса миру и Избавителя недугов рождшая, Тебе молюся, Благой: от растлевающих недугов возстави мя.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь

Ектения малая.

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.

Прокимен, глас 7: Возлюблю Тя, Господи, крепосте моя, Господь утверждение мое.

Стих: Бог мой, Помощник мой и уповаю на Него.

Прокимен Богородице, глас 4: Помяну имя Твое во всяком роде и роде.

Стих: Слыши Дщи и виждь и приклони ухо Твое.

Всякое дыхание: глас 4.

Евангелие от Иоанна, зач. 46 от полу.

Рече Господь Своим учеником, заповедь новую даю вам, да любите друг друга: якоже возлюбих вы, да и вы любите себе. О сем разумеют вси, яко Мои ученицы есте, аще любовь имате между собою. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творити, елика Аз заповедаю вам.

К Богородице (Лк. зач. 4).

Во дни оны, воставши Мариам, иде в Горняя со тщанием, во град Иудов. И вниде в дом Захариин, и целова Елисавет. И бысть, яко услыша Елисавет целование Мариино, взыграся младенец во чреве ея; и исполнися Духа Свята Елисавет. И возопи гласом велиим и рече: благословенна Ты в женах, и благословен Плод чрева Твоего. И откуду мне сие, да прииде Мати Господа моего ко мне? Се бо, яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа; и возрадовася дух Мой о Бозе Спасе Моем: яко призре на смирение Рабы Своея, се бо отныне ублажат Мя вси роди: яко сотвори Мне величие Сильный, и свято имя Его. Пребысть же Мариам с нею яко три месяцы, и возвратися в дом Свой.

Слава: Отче, Слове и Душе, Троице Святая, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, глас 6:

Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя: терпети не могу демонскаго стреляния, покрова не имам, или где прибегну окаянный, всегда побеждаем, и утешения не имам, кроме Тебе, Владычице мира, упование и предстательство верных, не презри моление мое, полезно сотвори.

Ектения:

Спаси, Боже, людей Твоих и благослови достояние Твое, посети мир Твой милостию и щедротами, возвыси рог христиан православных и ниспосли на нас милости Твоя богатыя, молитвами Всепречистой Владычицы нашей Богородицы и Приснодевы Марии; силою Честнаго и Животворящего Креста; предстательством честных Небесных Сил бесплотных; честнаго славнаго пророка Предтечи и Крестителя Иоанна, святаго славнаго и всехвалънаго апостола Иоанна Богослова и всех прочих святых славных и всехвальных апостолов; святых славных и добропобедных мучеников; преподобных и богоносных отцев наших; святаго благовернаго равноапостольнаго великаго князя Владимира и всех прочих святых, в земле Русской просиявших; святых праведных Богоотцев Иоакима и Анны и всех святых; молим Тя, Многомилостиве Господи, услыши нас грешных, молящихся Тебе, и помилуй нас.

Певцы: Господи, помилуй (12).

Возглас: Милостию и щедротами:
 

Песнь 7

Ирмос: От Иудеи дошедше:

Пресвятая Богородице, спаси нас.

Наше спасение якоже восхотел еси, Спасе, устроити, во утробу Девы вселился еси, Юже миру предстательницу показал еси: отец наших Боже, благословен еси.

Пресвятая Богородице, спаси нас.

Подателя милости, Егоже родила еси, Мати Чистая, умоли избавитися от прегрешений и душевных скверн, верою зовущим: отец наших Боже, благословен еси.

Слава: Сокровище спасения и Источник нетления, Тя родшую, и столп утверждения, дверь покаяния, показал еси зовущим: отец наших Боже, благословен еси.

И ныне: Телесныя слабости и душевныя недуги, Богородительнице, любовию приступающих к крову Твоему, Дево, исцелити сподоби, Спаса Христа нам родшая.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 8

Ирмос: Царя Небеснаго:

Пресвятая Богородице, спаси нас.

Помощи от Тебе требующих не презри, Дево, поющих и превозносящих Тя во веки.

Пресвятая Богородице, спаси нас.

Неможение души моея исцеляеши и телесныя болезни, Дево, да Тя прославлю, Чистая, во веки.

Слава: Исцелений богатство изливаеши верно поющим Тя, Дево, и превозносящим неизреченное Твое Рождество.

И ныне: Напастей Ты прилоги отгоняеши и страстей нападения, Дево; темже Тя поем во вся веки.

Хвалим, благословим, поклоняемся Господеви, поюще и превозносяще Его во веки.

Царя Небеснаго, Егоже поют вои ангельстии, хвалите и превозносите во вся веки.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с бесплотными лики Тя величающе.

Пресвятая Богородице, спаси нас.

Тока слез моих не отвратися, от всякаго лица всяку слезу отъемшаго, Дево, Христа родшая.

Пресвятая Богородице, спаси нас.

Радости мое сердце исполни, Дево, радости премшая исполнение, греховную печаль потребляющи.

Пресвятая Богородице, спаси нас.

Пристанище и предстательство к Тебе прибегающих буди, Дево, и стена нерушимая, прибежище же и покров и веселие.

Слава: Света Твоего зарями просвети, Дево, мрак неведения отгоняющи, благоверно Богородицу Тя исповедающих.

И ныне: На месте озлобления немощи смирившегося, Дево, исцели, из нездравия во здравие претворяющи.

Таже: Достойно есть:

И кадит священник алтарь и храм весь и людей. Мы же поем настоящия Богородичны:

Высшую небес и чистшую светлостей солнечных, избавльшую нас от клятвы, Владычицу мира песньми почтим.

От многих моих грехов немощствует тело, немощствует и душа моя, к Тебе прибегаю Благодатней, надеждо ненадежных, Ты ми помози.

Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе; о Владычице мира, буди Ходатаица.

Поем прилежно Тебе песнь ныне, всепетой Богородице радостно, со Предтечею и всеми святыми: моли, Богородице, еже ущедри ны.

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Посем: Трисвятое. Отче наш:

Тропарь, глас 4:

Союзом любви апостолов Твоих связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава:

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.

И ныне. Богородичен, глас 6:

Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианского.

Ектения сугубая:

Помилуй нас, Боже:

Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будем, и о спасении их искренно тщатися, молимся Тебе, благости источниче и человеколюбия пучина, скоро услыши и яко Благосерд помилуй.

Еще молимся и о еже услышати:

Возглас: Услыши ны, Боже:

Диакон: Господу помолимся.

Певцы: Господи, помилуй.

Предстоятель чтет молитву:

Господи Иисусе Христе Боже наш, давый ученика Твоим заповедь новую любити друг друга, приими молитву сию во оставление грехов всех нас, правоверных рабов Твоих, и иссякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твои исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, в горних обителях славити Тя и Безначального Твоего Отца и Святаго Духа в бесконечные веки веков.

Молитва Пресвятой Богородице:

О, Пресвятая Госпоже Владычице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормилице, грешных спасение, христиан всех поможение и заступление. О всемилостивая Госпоже Дево Богородице Владычице! Милостию Твоею спаси и помилуй Великого Господина и отца нашего Святейшего Алексия, Патриарха Московскаго и вся Руси, и преосвященные митрополиты, архиепископы и епископы, и весь священнический и иноческий чин, и всех христиан ризою Твоею честною защити; и умоли, Госпоже, из Тебе без семени воплотившегося Христа Бога нашего, да препояшет нас силою Своею свыше на невидимыя и видимыя враги наша. О, всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, землетрясения и потопа, от огня и меча, от нахождения иноплеменных и междоусобныя брани, и от внезапной смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабам Твоим всем православным христианам, и просвети им ум и очи сердечныя, еже ко спасению: и сподоби нас грешных рабов Твоих Царствия Сына Твоего, Христа Бога нашего: яко держава Его благословенна и препрославленна, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистыя Своея Матери, святаго славного и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец.