ПОСЛЕДОВАНИЕ БЛАГОДАРСТВЕННАГО МОЛЕБНАГО ПЕНИЯ О ПОЛУЧНИИ ПРОШЕНИЯ И О ВСЯКОМ БЛАГОДЕЯНИИ БОЖИЕМ
Диакону рекшу: Благослови владыко.
Возглашает предстоятель:
Слава Святей и Единосущней и Нераздельней Троице, всегда, ныне и присно и во веки веков.
Лик: Аминь.
Канонарх: Слава Тебе, Боже наш, слава Тебе.
Лик: Царю Небесный:
Канонарх: Трисвятое. Отче наш:
Возглас: Яко Твое есть Царство:
Канонарх: Аминь. Господи, помилуй (12). Слава, и ныне.
Приидите, поклонимся: (трижды).
Псалом 117.
Исповедайтеся Господеви, яко Благ, яко в век милость Его. Да речет убо дом Израилев: яко Благ, яко в век милость Его. Да речет убо дом Ааронь: яко Благ, яко в век милость Его. Да рекут убо вси; боящиися Господа: яко Благ, яко в век милость Его. От скорби призвах Господа и услыша мя в пространство. Господь мне Помощник, и не убоюся, что сотворит мне человек: Господь мне Помощник, и аз воззрю на врагов моих. Благо есть надеятися на Господа, нежели надеятися на человека. Благо есть уповати на Господа, нежели уповати на князи. Вси языцы обыдоша мя, и именем Господним противляхся им. Обышедше обыдоша мя, и именем Господним противляхся им. Обыдоша мя яко пчелы сот, и разгорешася яко огнь в тернии; и именем Господним противляхся им. Отриновен превратихся пасти, и Господь прият мя. Крепость моя и пение мое Господь, и бысть мне во спасение. Глас радости и спасения в селениих праведных. Десница Господня сотвори силу. Десница Господня вознесе мя, десница Господня сотвори силу. Не умру, но жив буду, и повем дела Господня. Наказуя наказа мя Господь, смерти же не предаде мя. Отверзите мне врата правды, вшед в ня исповемся Господеви. Сия врата Господня: праведнии внидут в ня. Исповемся Тебе, яко услыша мя еси, и был еси мне во спасение. Камень, егоже небрегоша зиждущии, сей бысть во главу угла. От Господа бысть сей, и есть дивен во очесах наших. Сей день, егоже сотвори Господь, возрадуемся и возвеселимся вонь. О Господи! спаси же! О Господи! поспеши же! Благословен грядый во имя Господне, благословихом вы из дому Господня. Бог Господь, и явися нам, составите праздник во учащающих до рог олтаревых. Бог мой еси Ты, и исповемся Тебе, Бог мой еси Ты, и вознесу Тя. Исповемся Тебе, яко услышал мя еси, и был еси мне во спасание. Исповедайтеся Господеви, яко Благ, яко в век милость Его.
Слава, и ныне. Аллилуия (трижды).
Ектения великая:
Миром Господу помолимся.
О свышнем мире:
О мире всего мира:
О еже милостивно нынешнее благодарение и мольбу нас недостойных рабов Своих в пренебесный Свой жертвенник прияти и по благосердию помиловати нас, Господу помолимся.
О еже не возгнушатися благодарением нас непотребных рабов Своих, егоже о приятых от Него благодеяниях во смиренном сердце приносим, но яко кадило благовонное и всесожжение тучное благоприятно Ему да будет, Господу помолимся1.
О еже и ныне послушати глас моления нас недостойных рабов Своих и доброе намерение и желание верных Своих во благое всегда исполнити, и всегда яко Щедр благодеяти нам и Церкви Своей Святой и всякому верному Своему рабу прошения даровати, Господу помолимся.
О еже избавити Церковь Свою Святую и рабов Своих (раба Своего, рабу Свою) (имя рек), и всех нас от всякой скорби, беды, гнева и нужды, и от всех врагов видимых и невидимых; здравием же, долгоденствием и миром и Ангелов Своих ополчением верных Своих оградити, Господу помолимся.
О избавитися нам:
Заступи, спаси, помилуй:
Пресвятую, Пречистую:
Возглас: Яко подобает:
На Бог Господь:
Тропарь, глас 4:
Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе. (Дважды.)
Слава, и ныне: той же.
Псалом избранный:
Благо есть исповедатися Господеви, и пети имени Твоему, Вышний, возвещати заутра милость Твою (91/2–3). Коль многое множество благости Твоея, Господи, юже скрыл еси боящимся Тебе (30/20). Радуйтеся Богу, Помощнику нашему, воскликните Богу Иаковлю (80/2). Исповемся Тебе, Господи, всем сердцем моим, повем вся чудеса Твоя. Возвеселюся и возрадуюся о Тебе, пою имени Твоему, Вышний (9/2–3), возрадуюся и возвеселюся о милости Твоей (30/8). Яко Ты, Боже, услышал еси молитвы моя (60/6). Да исполнятся уста моя хваления, яко да воспою славу Твою (70/8). Возрадуется сердце мое, воспою Господеви, благодеявшему мне, и пою имени Господа Вышняго (12/7). Не нам, Господи, не нам, но имени Твоему даждь славу, о милости Твоей (113/9). Благослови, душе моя, Господа, и вся внутренняя моя имя святое Его. Благослови, душе моя, Господа, и не забывай всех воздаяний Его, венчающаго тя милостию и щедротами, исполняющаго во благих желание твое (102/1–2, 4–5). Хвалу Господню возглаголют уста моя (144/21). Принесите Господеви славу и честь, принесите Господеви славу имени Его (95/7–8); воспойте, и радуйтеся, и пойте. Пойте Господеви в гуслех, в гуслех и гласе псаломском (97/4–5). Исповедайтеся Господеви, яко благ, яко в век милость Его (135/1).
На каноне припев: Слава Тебе, Боже Всещедрый2.
Катавасия:
Слава Тебе, Боже Всещедрый, за великия Твои милости на нас излиянныя, за нихже благодарение приносяще, Тя, яко Благодетеля нашего славим, хвалим, поем и величаем2.
Ектения сугубая.
Помилуй нас, Боже:
Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою), и припадаем и славословие Тебе яко Богу приносим и умильно вопием: избави от всех бед рабов Твоих и всегда яко Милостив исполни ко благу желания всех нас, прилежно молимся Тебе, услыши и помилуй3.
Якоже ныне милостивно услышал еси молитву рабов Твоих (раба Твоего, рабы Твоей), Господи, и явил еси на них (на нем, на ней) богатство человеколюбия Твоего, тако и на будущее время не презирая, исполни во славу Твою вся благая хотения верных Твоих и яви всем нам богатую милость Твою, все наши согрешения презираяй, молимся Тебе, услыши и помилуй.
Возглас: Яко милостив:
По 6-й песни катавасия и ектения малая.
Кондак, глас 3:
Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.
Прокимен, глас 4: Воспою Господеви благодеявшему мне и пою имени Господа Вышняго.
Стих: Возрадуется сердце мое о спасении Твоем.
Евангелие от Луки, зач. 85 (17, 12–19).
Во время оно, входящу Иисусови в некую весь, сретоша его десять прокаженных мужей, иже сташа издалеча. И тии вознесоша глас, глаголюще: Иисусе Наставниче, помилуй ны. И видев рече им: шедше покажитеся священником: и бысть идущим им, очистишася. Един же от них видев, яко исцеле, возвратися, со гласом велиим славя Бога. И паде ниц при ногу Его, хвалу Ему воздая. И той бе самарянин. Отвещав же Иисус, рече: не десять ли очистишася, да девять где? Како не обретошася возвращшеся дати славу Богу, токмо иноплеменник сей? И рече ему: востав иди, вера твоя спасе тя.
По 9-й песни: Достойно есть: Трисвятое. Отче наш: По возгласе
Тропарь, глас 4:
Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе.
Слава:
Кондак, глас 3:
Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.
И ныне. Богородичен, глас тойже:
Богородице христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех бед нас Твоими молитвами всегда избави, едина вскоре предстательствующая.
Ектения сугубая.
Помилуй нас Боже:
Благоприятно, яко кадило благовонное и яко тучная всесожжения да будет, Всеблагий Владыко, благодарение сие наше пред величеством славы Твоея и низпосли всегда яко Щедр рабам Твоим (рабу Твоему, рабе Твоей) богатые милости и щедроты Твоя и от всех сопротивлений видимых и невидимых врагов Церковь Твою Святую, град сей (весь сию, дом сей, обитель сию) избави, людем же Твоим всем безгрешное со здравием долгоденствие и во всех добродетелях преспеяние даруй молимся Тебе, Всещедрый Царю, милостивно услыши и скоро помилуй.
Еще молимся и о еже услышати Господу Богу:
Возглас: Услыши ны, Боже:
Молитва
Господи Иисусе Хрсте Боже наш, Боже всякого милосердия и щедрот, Егоже милость безмерна и человеколюбия неизследимая пучина: к Твоему величеству припадающе со страхом и трепетом, яко раби недостойнии, благодарение Твоему благосердию о Твоих благодеяниях на рабах Твоих (рабе Твоем, рабе Твоей) бывших ныне смиренно приносяще, яко Господа, Владыку и Благодетеля славим, хвалим, поем и величаем, и припадающе паки благодарим Твое безмерное и неизреченное милосердие, смиренно моляще. Да якоже ныне моления рабов Твоих (раба Твоего, рабы Твоея) прияти и милостивно исполнити сподобил еси, и на будущее время верным Твоим, в любви к Тебе и к братиям преспевающим, Твоя благодеяния всегда подавай; Церковь Твою Святую, град сей (весь сию, обитель сию, дом сей) от всякаго злаго обстояния избавляя, и мир и безмятежие тем даруй, и Тебе со Безначальным Твоим Отцем и Пpесвятым и Благим и Единосущным Твоим Духом во Едином Существе Славимому Богу, всегда благодарение приносити и преблагая глаголати и воспети сподоби: Слава Тебе Богу, Благодетелю нашему, во веки веков.
Лик: Аминь.
И поет песнь святаго Амвросия, епископа Медиоланскаго:
Тебе Бога хвалим, Тебе Господа исповедуем. Тебе Превечная Отца вся земля величает. Тебе вси Ангели, Тебе небеса и вся силы, Тебе Херувими и Серафими непрестанными гласы взывают: Свят, Свят, Свят Господь Бог Саваоф, полны суть небеса и земля величества славы Твоея. Тебе преславный апостольский лик, Тебе пророческое хвалебное число, Тебе хвалит пресветлое мученическое воинство. Тебе по всей вселенней исповедует Святая Церковь, Отца непостижимаго величества, покланяемаго Твоего истиннаго и Единороднаго Сына, и Святаго Утешителя Духа. Ты, Царю славы Христе, Ты, Отца присносущный Сын еси: Ты ко избавлению приемля человека, не возгнушался еси девическаго чрева. Ты, одолев смерти жало, отверзл еси верующим Царство Небесное; Ты одесную Бога седищи во славе Отчей, Судия приити веришися. Тебе убо просим: помози рабам Твоим, ихже честною кровию искупил еси. Сподоби со святыми Твоими в вечной славе Твоей царствовати. Спаси люди Твоя, Господи, и благослови достояние Твое, исправи их и вознеси их во веки: во вся дни благословим Тебе и восхвалим имя Твое во век и в век века. Сподоби, Господи, в день сей без греха сохранитися нам. Помилуй нас, Господи, помилуй нас: буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки. Аминь.
На отпусте иерей поминает святых в тот день празднуемых.
По отпусте поет диакон:
Рабом Божиим (рабу Божию, рабе Божией) подаждь, Господи, здравие и спасение и во всем благое поспешение, и сохрани их (его, сию) на многая лета.
Лик: Многая лета (трижды).
1 Если благодарственное молебное пение совершается в день рождения или по случаю годовщины брака, пострижения в монашество, или хиротонии, настоящее прошение может быть изменено:
О еже не возгнушатися благодарением нашим о благодеяниях на раба Божия (рабу Божию) (имя рек) в мимошедшия дни жизни его (ея) (в дни диаконства, или священства или иночества его; или на рабов Божиих имя рек во дни супружества их) излитыя, егоже во смиренном сердце приносим, но яко кадило благовонное и всесожжение тучное благоприятное Ему да будет, Господу помолимся.
2 Если благодарение возносится за избавление от опасности или болезни, на каноне припев: Слава Тебе Боже, Спасителю наш.
Катавасия: Слава Тебе Боже, Спасителю наш, за великия Твои милости на нас излиянныя, за нихже благодарение приносяще, Тя яко Спасителя и Благодетеля нашего славим, хвалим, поем и величаем.
3 Если благодарственное молебное пение совершается в день рождения или по случаю годовщины брака, пострижения в монашество, или хиротонии, настоящее прошение может быть изменено:
Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою) (имя рек) в мимошедшие дни жизни его (ея) (в дни диаконства его, священства его, иночества его, супружества их) и припадаем и славословие Тебе, яко Богу, приносим, и умильно вопием: избави и на будущее время от всех бед рабов Твоих (раба Твоего, рабу Твою) и всегда яко Милостив исполняй ко благу желание их (его, ея), прилежно молимся Тебе, услыши и помилуй.