НЕДЕЛЯ ВТОРАЯ ПО ПЯТИДЕСЯТ

НЕДЕЛЯ ВТОРАЯ ПО ПЯТИДЕСЯТНИЦЕ

ВСЕХ СВЯТЫХ В ЗЕМЛЕ РУССКОЙ ПРОСИЯВШИХ

ПОСЛЕДОВАНИЕ МОЛЕБНАГО ПЕНИЯ ВСЕМ СВЯТЫМ, В ЗЕМЛЕ РУССКОЙ ПРОСИЯВШИМ

Благословившу предстоятелю, канонарх глаголет: Приидите, поклонимся. Трижды.

И поем на оба лика псалом избранный.

1-й лик: Господи, Господь наш, яко чудно имя Твое по всей земли.

2-й лик: Вся земля да поклонится Тебе и поет Тебе, да поет же имени Твоему, Вышний.

1-й лик: Кто Бог велий, яко Бог наш? Ты еси Бог, творяй чудеса.

2-й лик: Кто возглаголет силы Господни, слышаны сотворит вся хвалы Его?

1-й лик: Помянух дни древния, поучихся во всех делех Твоих.

2-й лик: Приидите, видите дела Божия, яже положи чудеса на земли.

1-й лик: Исповедайтеся Господеви и призывайте имя Его, возвестите во языцех дела Его.

2-й лик: Воспойте Ему и пойте Ему, поведите вся чудеса Его.

1-й лик: Хвалитеся о имени святом Его, да возвеселится сердце ищущих Господа.

2-й лик: Взыщите Господа и утвердитеся, взыщите лица Его.

1-й лик: Помяните чудеса Его, яже сотвори.

2-й лик: Той Господь Бог наш, по всей земле судьбы Его.

1-й лик: Помяни нас, Господи, во благоволении людей Твоих, посети нас спасением Твоим.

2 лик: Воскресни, Господи, помози нам и избави нас имене ради Твоего.

1-й лик: Доколе, Господи, прогневаешися до конца?

2-й лик: Не помяни наших беззаконий первых.

1-й лик: Скоро да предварят нас щедроты Твои, Господи, яко обнищахом зело.

2-й лик: Помози нам, Боже, Спасителю наш, славы ради имене Твоего.

1-й лик: Господи, избави нас и очисти грехи наши имене ради Твоего.

2-й лик: Да внидет пред Тя воздыхание окованных.

1-й лик: Яви, Господи, милость Твою и спасение Твое даждь нам.

2-й лик: Ты, Господи, сохраниши нас и соблюдеши нас от рода сего и во век.

1-й лик: Дадите славу Богу.

2-й лик: Буди имя Господне благословенно от ныне и до века.

1-й лик: Слава Отцу и Сыну и Святому Духу.

2-й лик: И ныне, и присно, и во веки веков. Аминь.

1-й лик: Аллилуиа, аллилуиа, аллилуиа, слава Тебе, Боже.

2-й лик: Аллилуиа, аллилуиа, аллилуиа, слава Тебе, Боже.

1-й лик: Аллилуиа, аллилуиа, аллилуиа, слава Тебе, Боже.

Посем канонарх возглашает и сам поет на глас греческим распевом:

Глас четвертый. Бог Господь и явися нам, благословен Грядый во имя Господне.

Канонарх поет во глас стих 2-й:

Обышедше обыдоша мя и именем Господним противляхся им.

2-й лик: Бог Господь и явися нам, благословен Грядый во имя Господне.

Канонарх поет стих 3-й:

Не умру, но жив буду и повем дела Господня.

1-й лик: Бог Господь и явися нам, благословен Грядый во имя Господне.

Канонарх поет стих 4-й:

Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.

2-й лик: Бог Господь и явися нам, благословен Грядый во имя Господне.

Таже 1-й лик поет:

Тропарь, глас 4:

Иерусалима Вышняго граждан,/ от земли нашея возсиявших/ и Богу во всяком чине/ и всяким подвигом угодивших,/ приидите, воспоим, вернии:/ о всеблаженнии земли Русской заступницы,/ молитеся ко Господу,/ да помилует сию от гнева Своего,/ исцеляя сокрушение ея,/ и верных людей Своих утешит.

2-й лик: поет тойже тропарь.

1-й лик: Слава, и ныне, Богородичен, глас тойже:

К Заступнице страны нашей,/ Приснодеве Богородице, притецем/ и к первописанной иконе Ея ныне припадем,/ с верою зовуще из глубины души:/ о Мати Божия, спаси землю Русскую,/ исцели сокрушение ея/ и верных людей утеши.

Посем поем на оба лика иной псалом избранный:

1-й лик: Исповедайтеся Господеви, яко Благ, яко в век милость Его.

2-й лик: Бог нам прибежище и сила.

1-й лик: Помощник в скорбях, обретших ны зело.

2-й лик: Многи скорби праведным.

1-й лик: Сеющии слезами радостию пожнут.

2-й лик: Воззваша ко Господу, внегда скорбети им, и от нужд их спасе их.

1-й лик: Воззваша праведнии, и Господь услыша их.

2-й лик: Святым, иже суть на земле Его, удиви Господь вся хотения Своя в них.

1-й лик: Праведницы наследят землю и вселятся в век века на ней.

2-й лик: Веселитеся о Господе и радуйтеся, праведнии.

1-й лик: Веселитеся, праведнии, о Господе и уповайте на Него.

2-й лик: Праведник, яко финикс, процветет и, яко кедр, иже в Ливане, умножится.

1-й лик: Блажени живущии в дому Твоем, в веки веков восхвалят Тя.

2-й лик: Дивен Бог во святых Своих, Бог Израилев.

1-й лик: Хранит Господь души преподобных Своих.

2-й лик: Блажени вси боящиися Господа, ходящии в путех Его.

1-й лик: Соберите Ему преподобных Его.

2-й лик: Милость Господня от века и до века на боящихся Его.

1-й лик: Весть Господь путь непорочных, и достояние их в век будет.

2-й лик: Господь воцарися, да радуется земля.

1-й лик: Возвестите во языцех славу Его, во всех людех чудеса Его.

2-й лик: Воцарися Бог над языки.

1-й лик: Спаси нас, Господи Боже наш, и собери нас от язык исповедатися имене Твоему святому.

2-й лик: От восток солнца до запад хвально имя Господне.

По окончании псалма начинаем пети канон святым, глас 8. Поем же его без ирмосов на 4.

Песнь 1

Ирмос: Воду прошед:

1-й лик: Все святые земли Русской, молите Бога о нас.

Многими содержими напастьми,/ к вам прибегаем, спасения ищуще,/ о святые сродницы наши,/ от лютых бед и нужд спасите нас.

2-й лик: Все святые земли Русской, молите Бога о нас.

Страстей прилоги и многия печали/ и беды обуревают нас,/ утешение нам подайте, святые,/ к Богу вашими молитвами.

1-й лик: Слава Отцу и Сыну и Святому Духу.

Спаса Христа молите, Российские чудотворцы,/ избавитися нам от бед и скорбей,/ земли же нашей от варварскаго нахождения/ вашим теплым предстательством.

2-й лик: И ныне и присно и во веки веков. Аминь.

В скорби нас и бедах сущих/ посещения Божественнаго/ и промышления от Тебе сподоби,/ о Богомати Владычице.

Священницы и оба лика вкупе поют катавасию:

Молите Бога о нас,/ все святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Сию катавасию поем по каждой песне.

Песнь 3

Ирмос: Небеснаго круга:

1-й лик: Все святые земли Русской, молите Бога о нас.

Заступники и покровители земли нашея вы есте,/ Божии угодницы,/ направите нас ко пристанищу спасения,/ вы бо есте верным ограждение.

2-й лик: Все святые земли Русской, молите Бога о нас.

Молим вас, блаженнии:/ душевное смущение и печали бурю разорите/ и тишину нам подати,/ Начальника тишины Христа умолите.

1-й лик: Слава Отцу и Сыну и Святому Духу.

Святым древним подражавшие/ и от Бога благодатию обогатившиеся,/ помогайте нам, чадам вашим,/ присно восхваляющим вас,/ яко Божиих угодников.

2-й лик: И ныне и присно и во веки веков. Аминь.

Лютыми недугами и страстьми греховными обуреваемым,/ и варварскими нападениями истязуемым,/ и в ров погибели впадающим,/ Ты нам помози, Богородице Дево.

Катавасия: Молите Бога о нас,/ все святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Ектения сугубая:

Помилуй нас, Боже, по велицей милости Твоей, молимся Тебе, услыши и помилуй.

Лик: Господи, помилуй. (Трижды.)

Еще молимся о Великом Господине и отце нашем Святейшем Патриархе Алексии, и о господине нашем преосвященнейшем епископе нашем (имя рек), и о всей во Христе братии нашей.

Лик: Господи, помилуй. (Трижды.)

Еще молимся о стране нашей и о спасении ея, и о еже возглаголати в сердцах правителей наших благая и мирная о Церкви Святей и о всех нас, да тихое и безмолвное житие поживем во всяком благочестии и чистоте.

Лик: Господи, помилуй. (Трижды.)

Еще молимся о милости, жизни, мире, здравии, спасении, посещении, прощении и благопоспешении рабов Божиих, архипастырей и пастырей и всех православных людей земли Русской и о еже умножити им лета жития их, избавити их от всякия болезни душевныя и телесныя и простити им всякое прегрешение, вольное и невольное.

Лик: Господи, помилуй. (12 раз.)

Еще молимся за всю братию и за вся христианы.

Лик: Господи, помилуй. (Трижды.)

Возглас: Яко милостив:

По возгласе 1 лик поет:

Седален, глас 2:

Моление теплое/ принесите, прехвальнии,/ к милости источнику, Господу,/ о Святой Руси молящеся,/ Богородицу Владычицу вкупе с собою подвигните на молитву/ и от бед избавите нас,/ всем вскоре предстательствующии.

Слава, и ныне, Богородичен, глас тойже:

Моление теплое и стена необоримая,/ милости источниче, мирови прибежище,/ прилежно вопием Тебе:/ Богородице Владычице, предвари/ и от бед избави нас,/ едина вскоре предстательствующая.

Катавасия: Молите Бога о нас,/ все святые земли Русской, / яко мы усердно/ к вам прибегаем,/ скорым помощникам и молитвенникам о душах наших.

Песнь 4

Ирмос: Услышах, Господи:

2-й лик: Все святые земли Русской, молите Бога о нас.

Страстей наших смущение/ и многих бед бурю/ предстательством вашим ко Господу/ утолити потщитеся, святые.

1-й лик: Все святые земли Русской, молите Бога о нас.

Милосердия бездну прострите нам, блаженнии,/ призывающим вас на помощь,/ вы бо у Милосердаго Бога/ дерзновение велие стяжали есте.

2-й лик: Слава Отцу и Сыну и Святому Духу.

Надежду имуще вас, славнии,/ и яко стену недвижиму,/ к Богу ваши молитвы стяжавше,/ зол и всех бед избавляемся.

1-й лик: И ныне и присно и во веки веков. Аминь.

Исцели, Чистая, душевныя наши немощи/ и страсти телесныя,/ поспеши, Госпоже, здравие подати,/ Врача всем рождшая, Христа.

Катавасия: Молите Бога о нас,/ вcи святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Песнь 5

Ирмос: Просвети нас повелении Твоими:

1-й лик: Все святые земли Русской, молите Бога о нас.

Исполните веселия жизнь нашу,/ избавляюще нас от варварскаго нахождения/ и междоусобной брани.

2-й лик: Все святые земли Русской, молите Бога о нас.

Избавите нас от бед,/ яко предстатели теплые/ и молитвенники о душах наших.

1-й лик: Слава Отцу и Сыну и Святому Духу.

Разрушите мглу прегрешений наших/ просвещением вашея светлости,/ светильницы Божественнии и пресветлии.

2-й лик: И ныне и присно и во веки веков. Аминь.

Избави нас от бед, Богородице Чистая,/ вечное рождши Избавление/ и мир, всяк ум превосходящий.

Песнь 6

Ирмос: Молитву пролию:

2-й лик: Все святые земли Русской, молите Бога о нас.

Молитвами вашими, блаженнии,/ утешение нам, в скорби сущим, испросите,/ и страну нашу падшую возставите/ и людей расточенных соберите,/ в скорби, яко Иона, вопиющих:/ от бед наших, Боже, избави нас.

1-й лик: Все святые земли Русской, молите Бога о нас.

Заступников вас вемы,/ отцы приснопамятные,/ и твердых хранителей земли нашей./ Темже к вам прибегающе,/ милость приемлем/ и бед различных избавление.

2-й лик: Слава Отцу и Сыну и Святому Духу.

Яко стену и пристанище/ стяжахом вас, святые,/ облегчение в скорбях,/ в бедах и напастях помощь,/ в болезнях исцеление/ и спасение душам нашим.

1-й лик: И ныне и присно и во веки веков. Аминь.

Заступницу Тя жизни вемы/ и твердую Хранительницу, Дево,/ и искушений тучи разсеявающую,/ и бесов нападения отгоняющую,/ и молимся всегда:/ от гибельных страстей наших избави нас.

Катавасия: Молите Бога о нас,/ все святые земли Русской,/яко мы усердно/ к вам прибегаем,/ скорым помощникам и молитвенникам о душах наших.

Ектения малая.

Кондак, глас 6:

Предстателие страны нашея неусыпные,/ ходатаи о нас ко Творцу непрестанные,/ не презрите молений наших,/ но, предваряюще на помощь, яко сродницы наши,/ ускорите на молитву/ и потщитеся на умоление,/ предстательствующе присно о чтущих вас.

Посем глаголет диакон:

Вонмем. Премудрость.

Канонарх же возглашает и сам поет прокимен на глас:

Прокимен, глас четвертый. Мне же зело честни быша/ друзи Твои, Боже.

1-й лик: Мне же зело честни быша/ друзи Твои, Боже.

Канонарх поет на глас стих:

Изочту их, и паче песка умножатся.

2-й лик: Мне же зело честни быша/ друзи Твои, Боже.

Канонарх поет:

Мне же зело честни быша...

1-й лик: Друзи Твои, Боже.

Диакон: Господу помолимся.

2-й лик: Господи, помилуй.

Предстоятель возглашает: Яко Свят еси, Боже наш...

2-й лик: Аминь.

Канонарх поет на глас 4: Всякое дыхание да хвалит Господа.

1-й лик: Всякое дыхание да хвалит Господа.

Канонарх поет стих:

Хвалите Господа с небес, хвалите Его в вышних.

2-й лик: Всякое дыхание да хвалит Господа.

Канонарх поет: Всякое дыхание.

1-й лик: Да хвалит Господа.

Диакон: И о сподобитися нам слышанию Святаго Евангелия Господа Бога молим.

2-й лик: Господи, помилуй. (Трижды.)

Диакон: Премудрость, прости, услышим Святаго Евангелия.

Предстоятель: Мир всем.

2-й лик: И духови твоему.

Предстоятель: От Иоанна Святаго Евангелия чтение.

1-й лик: Слава Тебе, Господи, слава Тебе.

Диакон: Вонмем.

И чтет предстоятель Святое Евангелие от Иоанна, зачало 51 (Ин. 15, 12—20):

Рече Господь Своим учеником: сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедаю вам. Не ктому вас глаголю рабы, яко раб не весть, что творит господь его; вас же рекох други, яко вся, яже слышах от Отца Моего, сказах вам. Не вы Мене избрасте, но Аз избрах вас и положих вас, да вы идете и плод принесете, и плод ваш пребудет, да егоже аще просите от Отца во имя Мое, даст вам. Сия заповедаю вам, да любите друг друга. Аще мир вас ненавидит, ведите, яко Мене прежде вас возненавиде. Аще от мира бысте были, мир убо свое любил бы; якоже от мира несте, но Аз избрах вы от мира, сего ради ненавидит вас мир. Поминайте слово, еже Аз рех вам: несть раб болий господа своего. Аще Мене изгнаша, и вас изженут; аще слово Мое соблюдоша, и ваше соблюдут.

2-й лик: Слава Тебе, Господи, слава Тебе.

1-й лик: Слава Отцу и Сыну и Святому Духу.

Молитвами всех святых Русских,/ Милостиве, очисти/ множество согрешений наших.

2-й лик: И ныне и присно и во веки веков. Аминь.

Молитвами Богородицы,/ Милостиве, очисти/ множество согрешений наших.

1-й лик: Помилуй мя, Боже,/ по велицей милости Твоей/ и по множеству щедрот Твоих/ очисти беззаконие мое.

2-й лик:

Стихира, глас 6:

Не вверите нас человеческому предстательству,/ святые сродницы,/ но приимите моления наша,/ скорбь бо обдержит нас,/ терпети не можем вражеских озлоблений/ и утешения на земле не имамы./ Моление наше не презрите,/ Небесные предстателие наши,/ утешение нам подайте/ и вся полезная от Бога испросите.

Посем глаголет диакон:

Спаси, Боже, люди Твоя и благослови достояние Твое, посети милостию и щедротами Твоими землю Русскую, утверди в ней веру истинную; разшири, умножи, умири и непоколебиму от адовых врат во веки сохрани Церковь Святую; умудри архипастырей и пастырей наших право правити слово Твоея истины, разори и вскоре испраздни всякое разделение и ересей востание; соблюди в мире паству православную, возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Твоея; предстательством честных Небесных Сил бесплотных; честнаго славнаго пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей: Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, чудотворца; святых равноапостольных Мефодия и Кирилла, учителей Словенских; святых равноапостолов Русских благовернаго великаго князя Владимира и благоверной великой княгини Ольги; иже во святых отцев наших и всея России чудотворцев: Михаила, митрополита Киевскаго; Петра, Алексия, Ионы, Филиппа, священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобнаго и благовернаго великаго князя Александра Невскаго; преподобных и богоносных отцев наших: Антония и Феодосия Киево-Печерских; Сергия и Никона Радонежских; Антония Римлянина и Варлаама Хутынскаго, Новгородских; Зосимы и Савватия Соловецких; Серафима Саровскаго и всех святых, в земле Русской просиявших, ихже память совершаем ныне, святых славных и добропобедных мучеников, преподобных и богоносных отцев наших; святых и праведных Богоотцев Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй. (12 раз.)

Возглас: Милостию и щедротами...

Песнь 7

Ирмос: От Иудеи дошедше:

1-й лик: Все святые земли Русской, молите Бога о нас.

Наше спасение якоже восхотел еси, Спасе, устроити,/ прославлявши святых сродников наших чудесами, имиже ко благочестию наставляеми, поем:/ отцев наших Боже, благословен еси.

2-й лик: Все святые земли Русской, молите Бога о нас.

Милостиваго умолите, святые,/ избавитися от прегрешений и душевных скверн/ верою зовущим:/ отцев наших Боже, благословен еси.

1-й лик: Слава Отцу и Сыну и Святому Духу.

Сокровище спасения/ вы есте, Божии угодницы,/ и наставницы покаяния вопиющим:/ отцев наших Боже, благословен еси.

2-й лик: И ныне и присно и во веки веков. Аминь.

Телесныя слабости и дущевныя недуги, Богородительнице,/ любовию приступающих к Тебе, Дево,/ исцелити сподоби,/ Спаса Христа нам рождшая.

Катавасия: Молите Бога о нас,/ все святые земли Русской,/ яко мы усердно к вам прибегаем,/ скорым помощникам и молитвенникам о душах наших.

Песнь 8

Ирмос: Царя Небеснаго:

2-й лик: Все святые земли Русской, молите Бога о нас.

Помощи вашей требующих/ не презрите, блаженнии,/ поющих и превозносящих Христа во веки.

1-й лик: Все святые земли Русской, молите Бога о нас.

Неможение душ наших исцеляете/ и от телесных болезней воставляете,/ превозносящих Христа во веки.

2-й лик: Слава Отцу и Сыну и Святому Духу.

Исцеления источаете, Божии угодницы,/ всем к вам притекающим с любовию/ и Христа превозносящим во веки.

1-й лик: И ныне и присно и во веки веков. Аминь.

Напастей Ты прилоги отгоняеши/ и страстей нападения, Дево,/ темже Тя поем во вся веки.

2-й лик: Хвалим, благословим,/ поклоняемся Господеви,/ поюще и превозносяще Его во веки.

Ирмос: Царя Небеснаго,/ Егоже поют вои ангельскии, / хвалите и превозносите во вся веки.

Песнь 9

Ирмос: Воистину Богородицу Тя исповедуем,/ спасенные Тобою, Дево Чистая,/ с бесплотными лики Тя величающе.

2-й лик: Все святые земли Русской, молите Бога о нас.

Моление наше услышавше, честнии,/ нечестие в земле Русской потребите,/ нас же всех во Православии укрепите.

1-й лик: Все святые земли Русской, молите Бога о нас.

Радости сердца наши исполните,/ радости неизреченныя наслаждающиеся,/ нашу греховную печаль потребляюще.

2-й лик: Слава Отцу и Сыну и Святому Духу.

Во дни скорбных обстояний не оставите нас,/ предстателие наши и хранителие,/ но помощь скорую нам явите.

1-й лик: И ныне и присно и во веки веков. Аминь.

Пристанище и предстательство к Тебе прибегающих буди, Дево,/ и стена нерушимая,/ прибежище же и покров и веселие.

Тоже 2-й лик за Достойно поет стих сей, глас 8:

Владычице, приими молитвы рабов Твоих/ и избави нас от всякия нужды и печали./ Ты еси, Богородице, оружие наше и стена;/ Ты еси Заступница, и к Тебе прибегаем;/ Тя и ныне на молитву призываем,/ да избавиши нас от врагов наших./ Возвеличим Тя вси,/ Всенепорочную Матерь Христа Бога,/ Юже осени Дух Пресвятый.

Посем Трисвятое. По Отче наш:

Тропарь, глас 8:

Якоже плод красный Твоего спасительнаго сеяния,/ земля Российская приносит Ти, Господи, вся святыя, в той просиявшия./ Тех молитвами в мире глубоце/ Церковь и страну нашу Богородицею соблюди, Многомилостиве.

Слава и ныне, глас тойже:

С Вышних призираяй,/ посети нас, грехов ради наших скорби терпящих, Владыко Всемилостиве,/ молитвами Богородицы и всех святых Русских/ даруй земле нашей велию милость.

Ектения сугубая, юже глаголет диакон с кадилом:

Помилуй нас, Боже, по велицей милости Твоей, молимся Тебе, услыши и помилуй.

1-й лик: Господи, помилуй. (Трижды.)

Еще молимся Господу Богу нашему, еже услышати Ему глас молитвы нашея и милостиву и долготерпеливу и умилену быти и тиху Человеколюбцу Богу о гресех наших и помиловати нас, и отвратити гнев Свой праведный от нас, и избавити нас от належащаго и праведнаго Его прещения, и сохранити великий царствующий град Москву, град сей (или весь сию) и вся грады и веси и всю землю Русскую от глада, губительства, земли трясения и потопа, огня и меча, мора, нашествия иноплеменных и междуусобныя брани, и избавити нас от належащих бед сих, и дати рабом Своим тихое и мирное время, и утешити скорбящих людий Своих, вопием все со умилением: Господи Святый, услыши и помилуй.

1-й лик: Господи, помилуй. (10 раз.)

2-й лик: Господи, помилуй. (10 раз.)

1-й лик: Господи, помилуй. (10 раз.)

2-й лик: Господи, помилуй. (10 раз.)

Еще молимся о еже услышати Господу Богу глас моления нас грешных и помиловати нас.

Лик: Господи, помилуй. (Трижды.)

Возглас: Услыши ны, Боже, Спасителю наш...

Посем возглашает диакон:

Ко всем святым земли Русской помолимся.

Лик: Все святые земли Русской, молите Бога о нас.

И чтет предстоятель молитву сию:

О всеблаженные и богомудрые угодницы Божии, подвигами своими землю Русскую освятившие и телеса свои, яко семя веры, в ней оставльшие, душами же своими Престолу Божию предстоящие и непрестанно о ней молящиеся! Се ныне, в день вашего общаго торжества, мы, грешнии, меньшии братия ваши, дерзаем приносити вам сие хвалебное пение. Величаем ваши великие подвиги, духовные воины Христовы, терпением и мужеством до конца врага низложившие и нас от прелести и козни его избавляющие. Ублажаем ваше святое житие, светильницы божественныя, светом веры и добродетелей светящиеся и наши умы и сердца богомудренно озаряющие. Прославляем ваши великие чудеса, цветы райские, в стране нашей северной прекрасне процветшие и ароматами дарований и чудес повсюду благоухающие. Восхваляем вашу богоподражательную любовь, предстатели наши и покровители, и, уповающе на помощь вашу, припадаем к вам и вопием: равноапостольные просветителие наши! Споспешествуйте людям Русской земли преданную вам веру православную твердо содержати, да спасительное семя, вами всеянное, не изсушено будет зноем неверия, но, дождем Божия поспешения напоенное, плод изобильный да принесет. Святителие Христовы! Молитвами вашими утвердите веру русскую, ереси, расколы и нестроения в ней потребите, расточенныя овцы во едино соберите и от всяких волков, во одежде овчей в стадо Христово входящих, оградите. Преподобные отцы! Сохраните нас от прелестей мира сего лукаваго, да, отвергшеся себе и вземше крест свой, последуем Христу, распинающе плоть свою со страстьми и похотьми, носяще тяготы друг друга. Благоверные князие! Воззрите милостивно на земное Отечество ваше и вся нечестия и соблазны, в нем ныне сущия, оружием молитв ваших потребите, да, якоже древле, тако и ныне и в грядущее время, прославляется на Святой Руси имя Господне. Страстотерпцы российские преславные! Укрепите нас в мужественном стоянии даже до крови за веру православную и обычаи отеческие, да ни скорбь, ни теснота, ни гонения, ни глад, ни нагота, ни меч не возмогут нас разлучити от любви Божией, яже о Христе Иисусе. Блаженные, Христа ради юродивые и праведные! Посрамите мудрость века сего, возносящуюся на разум Божий, нам же помозите, спасительным буйством Креста Христова утвердившеся, соблазнами мудрости мирской непозыблемым быти, горнее присно, а не земное помышляти. Богомудрыя жены, в немощнем естестве подвиги велии явившие! Молитеся, да дух вашей любве ко Господу и ревность о угождении Ему и о своем и ближняго спасении не оскудевает в нас. Все святые сродники наши, от лет древних просиявшие и в последние дни подвизавшиеся, явленные и неявленные, ведомые и неведомые! Помяните нашу немощь и уничижение и молитвами вашими испросите у Христа Бога нашего, да и мы, безбедно преплывше житейскую пучину и невредимо соблюдше сокровище веры, в пристанище вечнаго спасения достигнем и в блаженных обителях Горняго Отечества вкупе с вами и со всеми угодившими от века святыми водворимся благодатию и человеколюбием Спасителя нашего Господа Иисуса Христа, Емуже со Превечным Отцем и Пресвятым Духом подобает непрестанное славословие и поклонение от всех тварей во веки веков.

Лик: Аминь.

И прочая по обычаю и отпуст:

Христос, Истинный Бог наш, молитвами Пречистыя Своея Матере, святаго равноапостольнаго благовернаго великаго князя Владимира и всех святых, в земле Русской просиявших, помилует и спасет нас, яко Благ и Человеколюбец.

По отпусте поет диакон:

Спаси, Христе Боже, Великаго Господина и отца нашего Святейшаго Алексия Московскаго и всея России Патриарха с богохранимою его паствою, землю Русскую в мире сохрани и веру православную в ней утверди во веки веков. Аминь.

1-й лик: Спаси, Христе Боже. Спаси, Христе Боже. Спаси, Христе Боже.

2-й лик: Спаси, Христе Боже. Спаси, Христе Боже. Спаси, Христе Боже.

1-й лик: Спаси, Христе Боже. Спаси, Христе Боже. Спаси, Христе Боже.

Посем сошедшеся на исходе поем:

Утверждение на Тя надеющихся, утверди, Господи, Церковь, юже стяжал еси Честною Твоею Кровию.

Под Твою милость прибегаем, Богородице Дево! Молений наших не презри в скорбех, но от бед избави нас, Едина Чистая и Благословенная.

Пресвятая Богородице, спаси нас.

Все святые земли Русской, молите Бога о нас.