ПОСЛЕДОВАНИЕ   МОЛЕБНАГО   ПЕНИЯ

ПЕРЕД   НАЧАЛОМ   УЧЕНИЯ   В   ВЫСШЕЙ   ШКОЛЕ

По обычном начале псалом избранный:

Велий Господь наш, и велия крепость Его, и разума Его несть числа (146/5). Исповедайтеся Господеви, яко благ, яко в век милость Его. Сотворшему чудеса велия единому. Сотворшему небеса разумом. Утвердившему землю на водах. Сотворшему светила велия единому. Солнце во область дне. Луну и звезды во область нощи (135/1, 5–9). Вся премудростию сотворил еси (103/24). Яко возвеличишася дела Твоя, Господи, зело углубишася помышления Твоя. Муж безумен не познает и не разумеет сих (91/6–7). Блажен человек, егоже аще наставиши, Господи, и от закона Твоего научиши (93/12). Блажен муж, иже не иде на совет нечестивых, и на пути грешных не ста, и на седалищи губителей не седе. Но в законе Господни воля его, и в законе Его поучится день и нощь. И будет яко древо, насажденное при исходищих вод, еже плод свой даст во время свое, и лист его не отпадет, и вся, елика аще творит, успеет. Не тако нечестивии, не тако (1/1–4). Уклонися от зла в сотвори благо (33/15). Не ревнуй еже, лукавновати, зане лукавнующии потребятся (36/8–9). Удержи язык твой от зла, и устне твои, еже не глаголати льсти (33/14). Не ревнуй лукавнующим (36/1). Да возвеселится сердце ищущих Господа. Взыщите Господа и утвердитеся (104/3–4). Начало премудрости страх Господень (110/10). Словеса Господня, словеса чиста, сребро разжжено, искушено земли, очищено седмерицею (11/7). Закон Господен непорочен, обращаяй души, свидетельство Господне верно, умудряющее младенцы (18/8).

Разжжено слово Твое зело, и раб Твой возлюби е. Благ мне закон уст Твоих, паче тысящ злата и сребра (118/140, 72). Господи, устне мои отверзеши, и уста мои возвестят хвалу Твою (50/17). Не уклони сердце мое в словеса лукавствия (140/4). Сердце чисто созижди во мне, Боже (50/12). Посли свет Твой и истину Твою, и та мя настависта (42/3). Потоком сладости Твоея напоиши я (35/9). Безвестная и тайная премудрости Твоея явил ми еси (50/8). Язык мой поучится правде Твоея, весь день хвале Твоей (34/28). Поучуся во всех делех Твоих (76/13). О заповедях Твоих размышляти буду и уразумею пути Твоя. Во оправданиих Твоих поучуся, не забуду словес Твоих (118/15–16). Научу беззаконныя путем Твоим (50/15). Не нам, Господи, не нам, но имени Твоему даждь славу, о истине Твоей (113/9). Юноши и девы да восхвалят имя Господне (148/12, 13). Боже сил, обратися убо, и виждь, и посети виноград сей, и соверши и, егоже насади десница Твоя (79/15–16).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже ниспослати на рабов сих (раба сего, рабу сию) духа премудрости и разума, и отверзти ум и уста, и просветити сердца их (его, ея) к приятию наставления добрых учений, Господу помолимся.

О еже всадити в сердца их (его, ея) начало премудрости, страх Свой божественный и тем очистити сердца их (его, ея) и просветити ум их (его, ея) да будут уклоняться от зла и творити благое, Господу, помолимся.

О еже отверзти ум их (его, ея) да приимут и разумети и памятствовати будут (будет) все добрыя и душеполезныя учения, Господу помолимся.

О еже подати (ему, ей) приседящую престолу Его премудрость и сию вселити в сердца их (его, сия), яко да научит, что есть благоугодное пред Ним, Господу помолимся.

О еже преспеяти им (ему, ей) премудростию и добродетельным житием, и благостоянием в православной вере во славу Божию, Церкви Святой на утверждение, к созиданию и пользе Отечества нашего, во благо народа нашего, Господу помолимся.

О избавитися нам:

Заступи, спаси, помилуй:

Пресвятую, Пречистую:

Возглас: Яко подобает:

На Бог Господь:

Тропари, глас 6:

Яко посреде учеников Твоих пришел еси, Спасе, мир дая им, прииди к нам, и спаси нас.

Безкнижных учеников Дух Твой Святый учителями содела, Христе Боже, и многовещанною проповедию их языческое обольщение упраздни, яко Всесилен.

Слава, глас 8:

Благословен еси, Христе Боже наш, иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.

И ныне. Богородичен, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Прокимен, глас 4: Начало премудрости страх Господень.

Стих: Благословлю Господа, вразумившаго мя.

Апостол к Коринфянам, зач. 125 (1 Кор. 1, 18–26; Кол. 2, 8; 1 Кор. 1, 27–31).

Братие, слово крестное погибающим убо юродство есть, а спасаемым нам сила Божия есть. Писано бо есть: погублю премудрость премудрых, и разум разумных отвергу. Где премудр? Где книжник? Где совопросник века сего? Не обуи ли Бог премудрость мира сего? Понеже бо в премудрости Божией не разуме мир премудростию Бога, благоизволил Бог буйством проповеди спасти верующих. Понеже и иудее знамения просят, и еллини премудрости ищут. Мы же проповедуем Христа распята, иудеем убо соблазн, еллином же безумие. Самем же званным иудеем же и еллином, Христа, Божию силу и Божию премудрость. Зане буее Божие, премудрее человек есть, и немощное Божие, крепчае человек есть. Братие, блюдитеся, да никтоже вас будет прельщая философиею и тщетною лестию, по преданию человеческому, по стихиям мира, а не по Христе. Но буяя мира избра Бог, да премудрыя посрамит: и немощная мира избра Бог, да посрамит крепкая. И худородная мира и уничиженная избра Бог, и не сущая, да сущая упразднит. Яко да не похвалится всяка плоть пред Богом. Из Него же вы есте о Христе Иисусе, Иже бысть нам премудрость от Бога, правда же и освящение и избавление. Да, якоже пишется, хваляйся, о Господе да хвалится.

Евангелие от Иоанна, зач. 29 (8, 12, 31–32; 12, 36; 14, 6, 21, 23; 16, 1–2, 4–5, 7, 13).

Рече Господь ко пришедшим к Нему иудеем: Аз есмь свет миру. Ходяй по Мне, не имать ходити во тьме, но имать свет животный. Аще вы пребудете во словеси Моем, воистинну ученицы Мои будете. И уразумеете истину, и истина свободит вы. Дондеже свет имате, веруйте во свет, да сынове света будете. Aз есмь путь, и истина, и живот: никтоже приидет ко Отцу, токмо Мною. Имеяй заповеди Моя, и соблюдаяй их, той есть любяй Мя: а любяй Мя, возлюблен будет Отцем Моим: и Аз возлюблю его, и явлюся ему Сам. Аще кто любит Мя, слово Мое соблюдет: и Отец Мой возлюбит его, и к нему приидема, и обитель у него сотворима. Сия глаголах вам, да не соблазнитеся. От сонмищ ижденут вы: но приидет час, да всяк, иже убиет вы, мнится службу приносити Богу. Но сия глаголах вам, да егда приидет час, поминайте се, яко Аз рех вам: Сих же вам исперва не рех, яко с вами бех. Ныне же иду к Пославшему Мя, и никтоже от вас вопрошает Мене: камо идеши? Но Аз истину вам глаголю: уне есть вам, да Аз иду. Аще бо не иду Аз, Утешитель не приидет к вам. Аще ли же иду, послю Его к вам. Егда же приидет Он, Дух истины, наставит вы на всяку истину.

Ектения сугубая:

Помилуй нас Боже:

Еще молимся Господу Богу нашему, да призрит на сих рабов (сего раба, сию рабу) Его и да ниспослет в сердца, во ум и во уста их (его, ея) духа премудрости, разума же и благочестия, и страха Своего и просветит их (его, сию) светом Своего благоразумия и подаст им (ему, ей) силу и крепость к скорому восприятию и спешному научению божественнаго закона Его наставлению и всему благому и полезному учению, да преуспевают они (преуспевает он, она) премудростию и разумом и всеми благими делами, во славу пресвятаго Его имени, Церкви и Отечеству на пользу, рцем вси, Господи, услыши и помилуй.

Возглас: Услыши ны, Боже:

Молитва

Господи, Боже и Создателю наш, почтивший людей образом Своим, научивший избранных Твоих, яко дивишася вси внимавшии учению их, открывший премудрость младенцам, научивший Соломона и всех искавших премудрости Твоей; отверзи сердце, умы и уста рабов Твоих (сердце, ум и уста раба Твоего, рабы Твоея) да приимут (приимет) силу закона Твоего и уразумеют (уразумеет) благую и совершенную волю Твою и со успехом познают (познает) преподаваемая им (ему, ей) полезная учения во славу пресвятаго имени Твоего, во утверждение Святыя Церкви, на пользу и созидание Отечества нашего, во благо народа нашего. Избави сих рабов Твоих (сего раба Твоего, сию рабу Твою) от всякаго соблазна вражия, соблюди их в православной вере и во всяком благочестии и чистоте во вся дни жизни их (его, ея), да преуспевают (преуспевает) в разуме и во исполнении заповедей Твоих; да тако предуготовани (предуготован, предуготована) прославят (прославит) пресвятое имя Твое и будут наследницами (будет наследником, наследницей) Царствия Твоего. Яко Ты еси премудрости Наставник и смысла Податель, и Тебе подобает всякая слава, честь и поклонение, Отцу и Сыну и Святому Духу всегда, ныне и присно и во веки веков. Аминь.

Отпуст:

Христос, истинный Бог наш, молитвами Пречистыя Своея Матери; предстательством святых Ангелов Хранителей наших; святых славных, всехвальных, духоносных и богопроповедников апостолов; иже во святых отцев наших и вселенских великих учителей и святителей Василия Великого, Григория Богослова и Иоанна Златоустаго⁴⁵, святаго благовернаго равноапостольнаго великаго князя Владимира; преподобных отец наших Нестора, перваго летописца Российскаго⁴⁶ и Агапита⁴⁷ врача; святаго (Русскаго святаго в тот день празднуемаго) и всех прочих святых в земли Русской просиявших; святаго мученика Иустина Философа⁴⁸; святаго (вселенскаго святаго, в тот день празднуемаго), святых праведных Богоотцев Иоакима и Анны и всех святых, помилует и спасет нас, яко Благ и Человеколюбец.

По отпусте поет диакон:

Рабам Божиим начальствующим, учащим и учащимся подаждь, Господи, здравие и спасение и трудах их благое поспешение и сохрани их на многая лета.

Певцы: Многая лета (трижды).

И целуют учащиеся святый крест, иерей же кропит их освященною водою.

⁴⁵ 30 января.

⁴⁶ 27 октября.

⁴⁷ 1 июня. Первый ученый врач на Руси.

⁴⁸ 1 июня.