ПОСЛЕДОВАНИЕ   МОЛЕБНАГО   ПЕНИЯ

ВО   ВРЕМЯ   ГУБИТЕЛЬНАГО   ПОВЕТРИЯ   И   СМЕРТОНОСНЫЯ   ЗАРАЗЫ

Иерей начинает: Благословен Бог наш:

Клир: Царю Небесный:

Чтец: Трисвятое. Приидите, поклонимся: (трижды).

Псалом 37.

Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей, от лица гнева Твоего: несть мира в костех моих, от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя, от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых, и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася, и сташа: И ближнии мои отдалече мене сташа, и нуждахуся ищущии душу мою; и ищущии злая мне глаголаху суетная, и льстивным весь день поучахуся. Аз же яко глух не слышах, и яко нем не отверзаяй уст своих, И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои, и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая воз благая, оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.

Или псалом 90.

Живый в помощи Вышняго, в крове Бога Небеснаго водворится. Речет Господеви: Заступник мой еси, и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна: Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тьма одесную тебе, к тебе же не приближится. Обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему. Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его. Долготою дней исполню его, и явлю ему спасение Мое.

Слава, и ныне.

Аллилуия, аллилуия, аллилуия, слава Тебе, Боже. (Трижды.)

Таже великая ектения, до: О плавающих: и прилагаются сия:

О еже не помянути беззаконий и соблазнов нас грешных и недостойных рабов Своих, но милостивно очистити грехи наша, и отвратити гнев Свой, праведно движимый на нас, Господу помолимся.

О еже не яростию Своею обличити, ни гневом наказати нас, но милостивно пощадити от смерти души наша, Господу помолимся.

О еже не внити в суд с рабами Своими, и не помянути беззакония наша, но очистити их, и милостиву быти, и пощадити людей согрешивших, Господу помолимся.

О еже помянути щедроты и милости Своя, от века сущия, грехов же юности и неведения нашего и старости окаянства не помянути, и помиловати нас, Господу помолимся.

О еже услышати от храма Святаго Своего глас наш, и исцелити болезни смертныя одержащия нас, и потоки беззакония смутившия нас изсушити, Господу помолимся.

О еже вскоре изъяти нас от сетей смертных и от болезней избавити, Господу помолимся.

О еже милостивно продолжити рабам Своим покаяния время, и не безгодно яко неплодную смоковницу посещи, но благосердием окопати, и милосердия росою напоити, плодов покаяния и обращения нашего человеколюбно еще ожидая, Господу помолимся.

О еже вознести нас от врат смертных, и меч изъятый, и лук Свой напряженный, и в нем сосуды смертныя на нас праведно уготованныя со стрелами горящими, милостивно от нас отвратити, Господу помолимся.

О еже услышати молитву нашу, и моление наше прияти, и слез наших не премолчати: но ослабити нам, да почием прежде даже не отыдем, и ктому не будем, Господу помолимся.

О избавитися нам:.. и проч.

Возглас: Яко подобает Тебе:

Глас 2: Бог Господь, и явися нам: со стихами.

Тропарь:

Во гневе Твоем, Боже, помяни щедроты Твоя, прах бо и пепел есмы, и не яростию Твоею обличи нас, да не погибнем до конца, но пощади души наша, яко един Милосерд. (Дважды.)

Слава, и ныне. Богородичен:

Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Псалом 50: Помилуй мя Боже:

Канон, глас 8,

ко Пресвятей и Единосущней и Животворящей и Неразделимей Троице

Песнь 1

Ирмос: Колесницегонителя фараона:

Припев: Господи, помилуй рабов Твоих.

Вседетельная и Единосущная, и Сопрестольная, и Единосильная, и Трисветлая Славо, Отче Непостижиме, Сыне и Душе Святый, от лютыя болезни рабов Твоих свободи, яко да благодарственно Тя славим.

Милостиве Господи, помилуй рабов Твоих.

Грехов буря изрину нас в глубину немощи, и частыя болезни, якоже треволнение нас обуревают окаянных: Единосильная Державо, Троице Святая, умилосердися, и спаси нас, люте погибающих.

Слава: О Троице нераздельная, избави нас Твоих рабов от грехов наших, росою милости Твоея угашающи зной лютых наших болезней, и здравие подающи, яко да православно воспеваем Тя.

И ныне. Богородичен: Избавителя и Вседетеля и Господа во чреве носившая, наша недуги понесшаго, Того убо Всечистая моли, от лютыя немощи Твоих рабов избавити, едина человеков Помоще.

Катавасия по каждой песни:

Избави от бед и болезней рабов Твоих Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 3
 

Ирмос: Небеснаго круга:

Милостиве Господи, помилуй рабов Твоих.

Небесныя лики, ангельския чины, Престоли, и Начала, и Силы, и Господьства, молят Тя, Благаго и Спаса: от губительнаго недуга свободи рабов Твоих.

Милостиве Господи, помилуй рабов Твоих.

Да Твоего многаго человеколюбия покажеши бездну, Владыко Всесильне, от недуга свободи смертоноснаго, и болезней лютых рабов Твоих, едине Долготерпеливе.

Слава: Яко Божии предстоятели, служебнии дуси, Ангелы и Архангелы, Сего молите, утолити недуг, разорити печаль, и от смертоносныя опасности избавити.

И ныне. Богородичен: Исцелений источника Тя благих показа, бездна из Тебе прошедшая, Христос Господь, Отроковице Пренепорочная: темже рабов Твоих бурею болезней потопляемых избави от опасностей.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Ектения сугубая:

Помилуй нас, Боже:

Согрешихом и беззаконновахом, и сего ради праведный Твой гнев постиже нас, Господи Боже наш, и сень смертная обыде нас, и ко адовым вратом приближихомся. Но к Тебе, Богу нашему, в скорби нашей умильно вопием: пощади, пощади людей Твоих, и не погуби до конца, смиренно молимся Тебе, услыши и помилуй.

Господи, помилуй (трижды).

Жизнию и смертию владычествующий, Господи, не затвори в смерти души рабов Твоих, но престани от гнева, и остави ярость, ибо исчезает яко дым дние наши, и изсше крепость наша, и погибаем до конца грех ради наших. Милостив буди рабам Твоим, в покаянии со слезами молимся Тебе, услыши и помилуй.

Господи, помилуй (трижды).

Помяни яко плоть есмы, Господи, и милостивно отврати гнев Твой, праведно на нас движимый, имже яко мечем безгодно посецаеши нас: устави болезнь и утоли язву внезапно нашедшую на нас. Не мертвии бо восхвалят Тя, и не вси низходящии во ад: но мы живии хвалим Тя, и в болезни сердца стеняще молимся Тебе, услыши и помилуй.

Господи, помилуй (трижды).

Паче всех согрешихом Тебе и беззаконновахом, Владыко: и аще покаяния не стяжахом, предложение наше вместо покаяния приими, и на милость преложися, от глада, смертоноснаго недуга, и болезней лютых, яко Всесилен свободи рабов Твоих, болезненно стеняще молимся Тебе, скоро услыши и помилуй.

Господи, помилуй (трижды).

Не помяни беззаконий и неправд людей Твоих, и не вниди в суд с рабами Твоими, и не уклонися гневом от рабов Твоих. Аще беззакония помянеши, Господи, кто постоит? Прах бо и пепел есмы, и состав наш яко ничтоже пред Тобою: но яко Щедр и Человеколюбец умилосердися, и не погуби нас во гневе Твоем со беззаконными нашими, молимся Тебе, Боже Преблагий, услыши и помилуй.

Господи, помилуй (трижды).

Не хотяй смерти грешных, но еже обратитися и живым быти им, яко жизни Источник, оживотвори нас, неправедных, Твоему суду смерти достойных: Бог бо еси, живыми и мертвыми обладаяй, и не погуби нас во гневе прещения Твоего, воплем крепким в горести сердца со слезами молимся Тебе, услыши и помилуй.

Господи, помилуй (трижды).

Возглас: Яко милостив:

Седален, глас 2:

Не отрини до конца согрешивших людей Твоих, Владыко, и не отстави милости и щедроты Твоя от нас: но яко Бездна сый щедрот, и милосердия Пучина, приими мольбы наша, и избави нас от угрожающия нам беды и нужды, един бо еси Благоуветливый.

Песнь 4

Ирмос: Ты моя крепость, Господи:

Милостиве Господи, помилуй рабов Твоих.

Ныне воистину сень смертная обыде нас, и ко адовым вратам приближихомся, но Ты, Спасе, яко силен нас возставляя удиви милости Твоя, спасаяй в вере несумненной вопиющих: силе Твоей слава, Человеколюбче.

Милостиве Господи, помилуй рабов Твоих.

Христовы таинницы, самовидцы и проповедницы, приимшии дар исцеления и врачеве суще душевнии, апостоли, избавите нас oт угрожающего недуга, Иисуса моляще Владыку, и Избавителя, и Господа.

Слава: Грехов буря ныне нас постиже, немощи волны обуревают, болезни погружают частыя, скорби бо и болезни нас окаянных обретоша, апостоли Господни, вашими мольбами помощи руку подайте.

И ныне. Богородичен: Болезньми лютыми и частыми ударяеми, Дево, вси Тебе припадаем: державным покровом Твоим, Чистая, спаси нас всех. Ущедри, Богоневестная, избави от мора и лютой немощи, и болезни исцели, Владычице.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.
 

Песнь 5
 

Ирмос: Вскую мя отринул еси:

Милостиве Господи, помилуй рабов Твоих.

Моря лести медоточными вашими моленьми, священнии пророцы, потопивше, ныне преложите горесть всю губительныя нынешния немощи, на божественную благомощия сладость.

Милостиве Господи, помилуй рабов Твоих.

Пронзени быхом стрелами немощи повелением Твоим, Господи, и утвердися на нас рука Твоя, Всесильне. Яко Бог Щедрый, ущедри всех Твоею милостию, молитвами святых мучеников Твоих.

Слава: Якоже древле сына вдовицы умерша возставил еси Твоим повелением, Слове, тако и ныне лютыя немощи рабов Твоих, яко един Благ и Милостив избавив, оживотвори, едине Человеколюбче.

И ныне. Богородичен: В нощи житейской буря постиже всякаго озлобления, и покрыла нас, Дево, немощи глубокая тьма: но возсияй нам, Пречистая, прохлаждения свет, и к свету заповедей Христовых пути наша направи.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 6
 

Ирмос: Очисти мя, Спасе:

Милостиве Господи, помилуй рабов Твоих.

В пучине немощей погружаемся и волны губительной напасти обуревают нас, Управителю Господи, помощи руку простер ныне, спаси.

Милостиве Господи, помилуй рабов Твоих.

Якоже древле разслабленнаго возставил еси, Божественным манием от недуга болезненнаго, и нас от одра озлобления и от недуга тягчайшаго, ущедрив, возстави и здравие подаждь, Многомилостиве.

Слава: Пророческий лик, апостолов собрание, полк страдальцев ныне молят Тя, едине Многомилостиве, о людех Твоих, Блаже, сих ущедри.

И ныне. Богородичен: Марие, чистое девства Сокровище, Ты очисти нас, и недугов и скорбей, и содержащия ныне немощи избави, да верою Тя прославим.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Ектения малая.

И по возгласе

Кондак, глас 6:

Болезни адовы обыдоша нас, и покры нас сень смертная, и яко воск от огня, дние наши тают от лица гнева Твоего, Господи: но яко Щедр, во гневе милости помяни и пощади людей Твоих, да живи суще в покаянии славим Тя, единаго Человеколюбца.

Вонмем. Премудрость. Вонмем.

Прокимен, глас 4: Господи, да не яростию Твоею обличиши мене, ни гневом Твоим накажеши мене.

Стих: Яко стрелы Твоя унзоша ко мне, и утвердил еси на мне руку Твою.

Апостол ко Евреем, зач. 331 от полу (12, 6–13).

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец? Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказателя, и срамляхомся: не много ли паче повинемся Отцу духовом, и живи будем? Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Аллилуия, глас 4.

Стих 1: Одержаша мя болезни смертныя, и потоцы беззакония смятоша мя.

Стих 2: Болезни адовы обыдоша мя, предвариша мя сети смертныя.

И о сподобитися нам слышанию Святаго Евангелия, Господа Бога молим.

Евангелие от Луки, зач. 16 (4, 37–44).

Во время оно, вниде Иисус в дом Симонов, теща же Симонова бе одержима огнем велиим, и молиша Его о ней. И став над нею, запрети огню, и остави ю: абие же воставши служаше им. Заходящу же солнцу, вси елицы имеяху болящия недуги различными, привождаху их к Нему: Он же на едином коегождо их руце возложь, исцеляше их. Исхождаху же и беси от многих, вопиюще и глаголюще: яко Ты еси Христос Сын Божий. И запрещая не даяше им глаголати, яко ведяху Христа Самаго суща. Бывшу же дни изшед иде в пусто место: и народи искаху Его и приидоша до Него, и держахуся Его, да не бы отшел от них. Он же рече ним: яко и другим градовом благовестити Ми подобает Царствие Божие, яко на се послан есмь. И бе проповедая на сонмищах галилейских.

Песнь 7

Ирмос: Божия снисхождения:

Милостиве Господи, помилуй рабов Твоих.

Опаляет пещь безмерных болезней, и сжигает мя непрестанно огневиц губительных пламень безстуднейший: но росою милости Твоея, Спасе, прохлади поюща: благословен, Бог отец наших.

Милостиве Господи, помилуй рабов Твоих.

Пророцы, апостоли, мучеников собори, божественнии учителие, болезни недугующих нас мольбами вашими укротите, и здравие даруйте поющим: благословен, Бог отец наших.

Слава: Словом Лазаря воскресивый, ныне яко из гроба от лютой немощи возставив нас оживи, Господи, да вопием песнь благодарственную: благословен, Бог отец наших.

И ныне. Богородичен: Щедра сущая и Мати Всещедраго, ущедривши избави Твоих людей, призывающих милости Твоя, Дево, и поющих: благословен, Бог отец наших.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.
 

Песнь 8

Ирмос: Седмерицею пещь:

Милостиве Господи, помилуй рабов Троих.

Болезненно стенем от одра болезни нашея, и от губительныя немощи вопием к Тебе, Человеколюбцу, сердечныя очи ныне простирающе, здравия просим. Посети нас, Спасе, и возстави пети: отроцы благословите, священницы воспойте, людие превозносите во вся веки.

Милостиве Господи, помилуй рабов Твоих.

В нашу немощь милостивне облекшийся, и уподобитися человекам изволивый, молитвами преподобных Твоих, погибающих спаси нас, воздвигни из гроба отчаяния пети: отроцы благословите, священницы воспойте, людие превозносите во вся веки.

Слава: Содетелю естества, Подателю исцеления, яко имеяй бездну щедрот и милосердия пучину, Долготерпеливе, посещением посети от губительныя немощи людей Твоих и оживи вопити: отроцы благословите, священницы воспойте, людие превозносите во вся веки.

И ныне. Богородичен: Крепкая Помоще, и надежное Заступление, отчаявшихся Надежде, Пренепорочная, посети страждущих болезненно рабов Твоих: облегчи тяжесть горькой немощи: отжени недуг губительной болезни, и спаси рабов Твоих, Дево Богородице.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.
 

Песнь 9
 

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес: тем Тя, Богородицу, Ангелов и человек чиноначалия величают.

Милостиве Господи, помилуй рабов Твоих.

Чудеса велия имже несть числа сотворивый, Безсмертне, на рабах Твоих, милости Твои, Боже, яко Милостив покажи, и от содержащая нас ныне болезни свободи, моленьми рождшия Тя, и лика страстотерпцев Твоих.

Милостиве Господи, помилуй рабов Твоих.

Ангелов, Архангелов и пророков, апостолов, мучеников, преподобных же, иерархов, священномучеников Твоих молитвами, плач рабов Твоих обрати, Всесильне, в радость: исцели болезнь, облегчи недуги, и здравие нам даруй.

Слава: Душ же и телес Врача, в милости богатаго Господа, Тебе молим: исцели страсти наши многия, от болезней и скорбей избави нас яко Благ и един Благодетель, и спасай верою чистою Тя величающих.

И ныне. Богородичен: Щедраго рождшая и Милостиваго, и Владыку, и Создателя и Господа, ныне на нас покажи Твоя обычно щедроты, и лютаго недуга нас изнуряющего избави нас, Дево Богородице, и подаждь нам здравие, яко да непрестанно величаем Тя.

Посем: Достойно есть: Трисвятое. Отче наш: Возглас.

И по возгласе, тропари: Помилуй нас Господи, помилуй нас:

Господи, помилуй нас, на Тя бо уповахом:

Милосердия двери отверзи нам:

Сугубая ектения:

Помилуй нас, Боже:

Милостивно призри Господи, на озлобление людей Твоих и умилосердися, и повели Ангелу простершему руку свою, еже погубити всех нас, якоже иногда при Давиде повелел еси, удержати руку свою, да не до конца нас погубит. И мы бо в покаянии Тебе исповедающеся, яко Давид вопием: согрешихом и беззаконновахом, и несмы достойни Твоего милосердия; но Ты Сам яко Щедр, единаго ради благосердия Твоего умолен быв, покажи милости Твоя древния и пощади людей и овец пажити Твоея, молимся Тебе, скоро услыши и помилуй.

Господи, помилуй (трижды).

Возглас: Услыши ны, Боже :

И по возгласе: Со умилением паки и паки преклоньше колена, Господу помолимся.

Господи, помилуй (трижды).

Молитва

Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и милосердие Твое раздраживших, и не вниди в суд с рабами Твоими, но отврати страшный гнев Твой праведно на нас движимый, утоли губительное прещение, устави грозный Твой меч, невидимо безвременно секущий нас, и пощади нищих и убогих рабов Твоих, и не затвори в смерти души наша, в покаянии сокрушенным сердцем и со слезами к Тебе, Милосердому, Благоуветливому, и Благопременительному Богу нашему припадающих.

Твое бо есть еже миловати и спасати нас, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

И отпуст.