М Е С Я Ц     Д Е К А Б Р Ь

1.Святаго праведнаго Филарета Милостиваго

Величание

Величаем Тя, святый праведный Филарете Милостиве, и чтим святую память твою, ты бо присно о милости к нам молиши Всемилостиваго Христа Бога нашего.

Псалом

Блажен разумеваяй на нища и убога, в день лют избавит его Господь.

Благ муж щедря и дая.

Весь день милует и взаим дает праведный.

Праведный щедрит и дает

Тебе оставлен есть нищий, сиру ты будь помощником.

Расточи, даде убоим.

Да узрят нищии и возвеселятся, и восхвалят имя Твое.

Любит милостиню Господь.

Милость Твоя, Господи, помогаше мне.

Благ мне закон уст Твоих, паче тысящ злата и сребра.

Возрадуюся о словесех Твоих, яко обретаяй корысть многу.

Многи скорби праведным, и от всех их избавит их Господь.

Воззваша праведнии и Господь услыша их, и от всех скорбей их избави их.

В память вечную будет праведник.

4. Преподобнаго отца нашего Иоанна Дамаскина, творца канонов

Величание и псалом общие песнописцу преподобному.

5. Преподобнаго и богоноснаго отца нашего Саввы Освященнаго

Величание и псалом общие преподобному во псалтири

5. Иже во святых отца нашего Гурия, архиепископа Казанскаго

Величание и псалом якоже святителю Герману 25 сентября.

6. Иже во святых отца нашего Николая, архиепископа Мир-Ликийских чудотворца

Величание

Величаем тя, святителю отче Николае Милостиве, великий чудотворче, скорый помощнице и теплый заступнице всех притекающих к тебе.

Псалом

Священницы Твои облекутся в правду и преподобнии Твои возрадуются.

Молитвы моя Господеви воздам пред всеми людьми Его, во дворех дому Господня.

Посреде церкви воспою Тя.

Приидите, чада, послушайте мене, страху Господню научу вас.

Возненавидех Церковь лукавнующих, и с нечестивыми не сяду.

Любит милостыню, Господь, милости Господни исполнь земля.

Весь день милует и взаим дает праведный.

Благ муж щедря и дая.

Милостив и щедр, и праведен.

Праведный щедрит и дает.

Был еси помощник мой.

Заступник мой и избавитель, защититель мой.

Милость его предварит мя.

Правда его пребывает в век века.

7. Преподобнаго отца нашего Нила Столобенскаго

Величание общее преподобному

Псалом преподобным подвизавшимся на островах:

Господь воцарися, да веселятся острова.

9. Зачатие праведной Анны, егда зачат Пресвятую Богородицу

Величание

Величаем вас, святии праведнии Богоотцы Иокиме и Анно, и славим неплодных прозябение, Святейшую Дщерь вашу, Пречистую Деву Марию.

Псалом

Помяни, Господи, Давида и всю кротость его.

Яко клятся Господеви, обещая Богу Иаковлю.

Преславная глаголашася о тебе, граде Божий.

Бог посреде его и не подвижится.

Клятся Господь Давиду истиною и не отвержется ея.

От плода чрева твоего посажду на претоле Твоем.

Помяну имя Твое во всяком роде и роде.

Многи скорби праведным и от всех их избавит их Господь.

Господь испытает праведнаго.

Внегда скорбети ми, призвах Господа, и к Богу моему воззвах.

Сеющии слезами, радостию пожнут.

Обратил еси плач мой в радость мне.

Кто, яко Господь наш, на смиренных призираяй, вселяяй неплодов в дом материю о чадах веселящеюся

Благословен Господь Бог Израилев от века и до века. Буди, буди.

9. Иконы Пресвятой Богородицы, именуемой Нечаянная радость

Величание

Величаем Тя, Пресвятая Дево, и чтим образ Твой святый, имже грешным нечаянную радость спасения возвещаеши.

Псалом общий Богородице третий:

Исповемся Тебя всем сердцем моим.

11. В недели святых праотец и святых отец пред Рождеством Христовым

Величание

Величаем вас, святии праотцы Христовы по плоти и вси ветхозаветные праведницы, и чтим святую память вашу, вы бо молите за нас Христа Бога нашего.

Псалом

Исповедайтеся Господеви и призывайте имя Его, возвестите во языцех дела Его.

Помяните чудеса Его, яже сотвори, чудеса Его и судьбы уст Его.

Семя Авраамле раби Его, сынове Иаковли, избрании Его.

Помяну в век завет Свой, слово еже завеща Аврааму, клятву Свою Исааку.

Постави сию Иакову в повеление, и Израилю в завет вечен.

Иакова избра себе Господь, Израиля в достояние Себе.

Даде им страны язык, яко да сохранят оправдания его и завета Его взыщут.

Избра колено Иудово, гору Сионю, юже возлюби.

Завещах завет избранным Моим, кляхся Давиду рабу Моему.

От плода чрева твоего посажду на престоли Твоем.

До века уготовлю семя Твое и созижду в род и род престол Твой.

Слыша и возвеселися Сион, и возврадовашася дщери Иудейския судеб ради Твоих, Господи.

Дивен Бог во святых своих, Бог Израилев.

Благословен Господь Бог Израилев от века и до века. Буди, буди.

15. Преподобнаго и богоноснаго отца нашего Трифона Печерскаго, просветителя лопарей

Величание

Ублажаем тя, преподобне отче Трифоне, и чтим равноапостольные труды твои, имиже в северных концах Русския земли трудился еси во благовестии Христове.

Псалом

Преподобнии Твои славу царствия Твоего рекут и силу Твою возглаголют.

Се удалихся бегая и водворихся в пустыни.

Услыши нас Боже, Спасителю наш, упование всех концев земли.

Север и море Ты создал еси.

Воцарися Бог над языки.

Возвестите во языцех славу Его, во всех людех чудеса Его.

Видех неразумевающих и истаях.

Провещает язык мой словеса Твоя.

Страху Господню научу вас.

Научу беззаконных путям Твоим.

Господь не оставит преподобных Своих, во век сохранятся.

Пойте Господеви преподобнии Его, и исповедайте память святыни Его.

Хранит Господь души преподобных Своих.

Слава сия Будет всем преподобным Его.

19. Гражданское новолетие

Там, где в день гражданскаго новолетия совершается праздничная церковная служба, на полиелейной утрени могут быть исполнены в уставном порядке нижеследующее величание и псалом избранный.

Величание

Величаем Тя, Живодавче Христе, на земли во плоти явльшагося проповедати времена Господни благоприятныя.

Псалом

Благословиши венец лета благости Твоея.

О Бозе похвалимся весь день, и о имени Твоем исповемыся во веке.

Возвеселимся о Нем, владычествующем силою Своею веком.

Будет имя Его благословенно во веки.

Прежде солнца пребывает имя Его.

В началех Ты, Господи, землю основал еси, и дела рук твоих суть небеса.

Та погибнут, Ты же пребываеши, и лета Твоя не оскудеют.

Тысяща лет пред очами Твоими, Господи, яко день вчерашний, иже мимо иде.

Царство Твое, царство всех веков.

Вся земля да поклонится Тебе и поет Тебе, да поет же имени Твоему, Вышний.

На всяк день благословлю Тя и восхвалю имя Твое в век и в век века.

Восхвалю Господа в жизни моей, пою Богу моему, дондеже есмь.

Се не воздремлет, и не уснет храняй Израиля.

Буди слава Господня во веки.

21. Иже во святых отца нашего Петра, митрополита всея Руси

Величание

Величаем тя, святителю отче Петре, твоим благословением град Москву, яко сердце Святой Руси, утвердившаго и о Русской земле Богу непрестанно молящагося.

Псалом

1. Священницы твои облекутся правдою, и преподобнии Твои возрадуются.

2. Господи, возлюбих благолепие дому Твоего, и место селения славы Твоея.

1. Молиттвы моя Господеви воздам пред всеми людьми Его, во дворех дому Господня.

2. Приидите, чада, послушайте мене, страху Господню научу Вас.

1. Даст ти Господь по сердцу твоему и весь совет твой исполнит.

2. Велий Господь и хвален зело, во граде Бога нашего, благокоренным радованием всея земли.

1. Град Царя великаго, Бог в храмах Его.

2. Яко избра Господь его в жилище Себе.

1. Видехом во граде Господа сил, во граде Бога нашего; Бог основа его.

2. Тамо уготовах светильник помазанную Моему.

1. Священники его облеку во спасение, и преподобнии его радостию возрадуются.

2. Праведник, яко финикс процветет, яко кедр, иже в Ливане, умножится.

1. Пребудет в век пред Богом.

2. Хвала его пребывает в век века.

21. Святой праведной Иулиянии, княгини Вяземской Новоторжской

Величание

Величаем тя, святая праведная княгине Иулияние, и чтим мученическую за целомудрие Христа ради кончину твою.

Псалом

Предзрех господа предо мною, яко одесную мене есть.

Прилепихся свидениям Твоим Господи.

Десница Господня вознесе мя.

Возлюбих заповеди Твоя паче злата и топазия.

Ко всем заповедям Твоим направляхся, всяк путь неправды возненавидех.

Неправду возненавидех и омерзих, закон же Твой возлюбих.

Мене ждаша грешницы погубити мя, свидения Твоя разумех.

На пути сем, по немуже хождах. скрыша сеть мне.

Положиша грешницы сеть мне, и от заповедей Твоих не заблудих.

Возскорбех во искушении моем, и смятохся от стужения грешница.

Сохрани мя от сети, юже составиши ми, и от соблазн делающих беззакония.

Тобою избавлюся от искушения.

Тебе ради умерщвляемся.

О Бозе спасение мое и слава моя.

22. Святой великомученицы Анастасии Узорешительницы

Величание

Величаем тя, святая великомученице Анастасие, узников и страдальцев утешительница, и чтим честныя страдания Твои, ихже последи и сама за Христа претерпела еси.

Псалом общий мученицы:

Бог наш прибежище и сила.

26. Собор Пресвятой Владычицы нашей Богородицы

Величание

Достойно есть величати Тя, Пресвятая Дево, воистину сущую Богородицу, без истления Бога Слово рождшую.

Псалом

Помяни, Господи, Давида и всю кротость его.

Яко клятся Господеви, обещахся Богу Иаковлю.

Освятил есть селение свое Вышний.

Бог посреде его и не подвижится.

Святыня и великолепие во святиле Его.

Преславная глаголашася о Тебе, граде Божий.

Яко веселящихся всех жилище в Тебе.

Свят храм Твой, дивен в правде.

Лицу Твоему помолятся богатии людстии.

Вся слава Дщери Цареви внутрь.

Рясны златыми одеяна и преиспещрена.

Слыши Дщи и виждь, и приклони ухо Твое.

Помяну имя Твое во всяком роде и роде.

Сего ради людие исповедятся Тебе в век, и в век века.

27. Святаго апостола, первомученика и архидиакона Стефана

Величание

Величаем тя, апостоле Христов и архидиаконе Стефане, и чтим честныя страдания твои, ихже ты первый за Христа претерпел еси.

Псалом

Блажен муж бояйся Господа, в заповедех Его восхощет зело.

В законе Господни воля Его, и в законе Его поучится день и нощь.

Господь даст глагол благовествующим силою многою.

Седоша князи и на мя клеветаху, раб же Твой размышляше о оправданиях Твоих.

Суди, Господи, обидящих мя, побори борющих мя.

Востани, Господи, и вонми суду моему, Боже мой, И Господи мой, на прю мою.

Небеса поведают славу Божию.

Возвестят небеса, правду Его, яко Бог судия есть.

Предзрех Господа предо мною.

Господь, не небеси престол Его, очи Его на нищаго призирают.

Тебе ради умерщвляемся, вменихомся, яко овцы заколения.

Аз же на Тя, Господи, уповах, в руках Твоих жребий мой.

Положил еси на главе его венец от камене честна.

Жизни просил есть у Тебе, и дал еси ему долготу дней во век века.

29. Святых младенцев, Христа ради избиенных от Ирода в Вифлееме Иудейском

Величание

Величаем вас, блаженнии младенцы Вифлеемские, первыми за Христа жизнь свою положивших и ныне с лики ангельскими непрестанно Господа славящих.

Псалом

Воскликните Господеви вся земля, пойте же имени Его, дадите славу хвале Его.

Рцыте Богу: коль дивна дела Твоя.

Ты восприял мя еси из чрева матери моея.

К Тебе привержен есмь от ложесн, от чрева матери моея Бог мой еси Ты.

Мене ждаша грешницы погубити мя.

Обыдоши мя пси мнози, сонм лукавых одержаша мя.

Обыдоша мя яко пчелы сот.

Тебе ради умерщвляемся, вменихомся яко овцы заколения.

Всякия кончины видех конец. Широка заповедь Твоя зело.

Мене же за незловие приял, и утвердил мя еси пред Тобою во век.

Храняй младенцы Господи; память их в род и род.

Хвалите Господа с небес, хвалите Его в вышних.

Хвалите Его вси ангели Его, хвалите Его вся силы Его.

Благословен Господь во век. Буди, буди.