М Е С Я Ц     Ф Е В Р А Л Ь

3. Святых Праведных Симеона Богоприимца и Анны пророчицы

Величание

Величаем вас, святии праведнии Симеоне и Анно, и чтим святую память Вашу, вы бо молите за нас Христа Бога нашего.

Псалом

Видена быша шестия Твоя, Боже, шествия Бога моего, Царя, иже во святем.

Господь во храме святем своем, Господь, на небеси престол Его.

Даже до старости и престарения моего, Боже мой, не остави мене, дондеже возвещу мышцу Твою роду всему грядущему.

Множеством милости Твоея вниду в дом Твой.

Посреди Церкви воспою Тя.

Старцы да восхвалят имя Господне.

От Тебе похвала моя, в церкви велицей исповемся Тебе.

Отрыгну сердце мое слово благо.

Глаголю аз дела моя Цареви.

Язык мой - трость книжника скорописца.

Ныне отпущаеши раба Твоего, Владыко, по глаголу Твоему с миром.

Видеста очи мои спасение Твое.

Свет во откровение языков и славу людей Твоих Израиля.

Свет возсия праведнику, и правым сердцем веселие.

3. Святаго благовернаго князя Романа Угличскаго

Величание и псалом общие князю правителю.

4. Святаго благовернаго великаго князя Георгия Владимирскаго

Величание

Величаем тя, страстотерпче, святый, благоверный великий князе Георгие, за веру и отечество и за людей твоих душу положившаго.

Псалом Бог нам прибежище и сила, помощник в скорбех, обретших нас зело.

Боже мой, на Тя уповах, да не постыжуся во век.

Внегда скорбети ми, призвах Господа, и к Богу моему воззвах.

Мнози изгонящии мя и стужающии ми.

Неправедно погнаша мя, помози ми.

Мене же за незлобие приял.

В руках Твоих жребий мой; избави мя из руки врагов моих и от гонящих мя.

Множицею брашася со мною от юности моея.

Господи, Господи, сила спасения моего, осенил еси над главою моею в день брани.

Языцы обыдоша мя и именем Господним противляхся им.

Обыдоша мя, яко пчелы сот, и разгорешися, яко огнь в тернии.

К Тебе воззвах, внегда уны сердце мое.

Вскую приспорбна еси, душе моя, вскую смущаеши мя? Уповай на Бога, яко исповемся Ему.

Святым, иже суть на земли Его, удиви Господь вся хотения своя в них.

5. Иконы Пресвятой Богородицы, именуемой Взыскание погибших

Величание

Достойно есть величати Тя, Богородице, грешных спасение и взыскание погибающих.

Псалом общий Богородице третий:

Исповемся Тебе всем сердцем моим.

10. Святой благоверной великой княгини Анны Новгородской

Величание

Величаем тя, святая благоверная великая княгине Анно, и чтим святую память твою, ты бо молиши за нас Христа Бога нашего.

Псалом праведной жене:

Предзрех Господа предо мною.

12. Иже во святых отца нашего Алексия, митрополита всея Руси

Величание

Величаем тя, святителю отче Алексие, о Русской земле пред царями неверными дерзновенно предстательствовавшаго и ныне о ней Богу непрестанно молящагося.

Псалом общий святителю.

14. Преподобнаго отца нашего Кирилла, учителя Словенского

Величание

Ублажаем тя,, преподобне отче Кирилле, вся Словенския страны ученьми твоими просветившаго и ко Христу приведшаго.

Псалом равноапостольным Кириллу и Мефодию 11-го мая.

17. Святаго священномученика Ермогена, Патриарха Московского

Величание

Величаем тя, священномучениче Ермогене, и чтим труды и узы твои и мученическую кончину, ихже за православие и за Русь Святую в годину смуты претерпел еси.

Псалом

Священницы Твои облекутся правдою, и преподобнии Твои возрадуются.

Господи, возлюбивших благолепие дому Твоего и место селения славы Твоея.

Молитвы моя Господеви воздам пред всеми людьми Его, во дворех дому Господня.

Уста моя возвестят правду Твою, весь день спасение Твое.

Приидите, чада, послушайте мене, страху Господню научу вас. Блажен муж, иже не иде на совет нечестивых.

Возненавидех церковь лукавнующих и с нечестивыми не сяду.

Умножися на мя неправда гордых.

Обыдоша мя тельцы мнози, юнцы тучнии одержаша мя.

Обышедше обыдоша мя, именем Господним противляхся им.

Господь утверждение мое, и прибежище мое, избавитель мой, Бог мой, помощник мой и уповаю на Него.

Пролию пред Ним моление мое, печаль мою пред Ним возвещу.

Аще и пойду посреде сени смертныя, не убоюся зла, яко Ты со мною еси.

Благословен Господь Бог Израилев, творяй чудеса Един, и исполнится славы Его вся земля. Буди, буди.

20. Святаго преподобномученика Корнилия, игумена монастыря Псково-Печерскаго

Величание

Ублажаем тя, преподобномучениче Корнилие, и чтим святую память Твою, наставниче монахов и собеседниче ангелов.

Псалом

Терпя потерпех Господа, и внят ми, и услыша молитву мою.

Твой есмь аз, спаси мя, яко оправданий Твоих взысках.

Постави на камени нозе мои, и исправи стопы моя.

Колена моя изнемогоста от поста, и плоть моя изменися елеа ради.

Слезами моими постелю мою омочу.

Полунощи востах исповедатися Тебе; седмерицею днем хвалих мя.

Предзрех Господа предо мною, яко одесную мене есть, не подвижуся.

Неправедно погнаша мя, помози ми.

На Бога уповах, не убояся, что сотворит мне человек.

Благо есть уповати на Господа, нежели уповати на князи.

Искусил еси нас, Боже, разжегл еси нас, якоже разжигается сребро.

Тебе ради умерщвляемся; вменихомся яко овцы заколения.

Всякия кончины видех конец, широка заповедь Твоя зело.

Пойте Господеви преподобнии Его, и исповедайте память святыни Его, во всех людех чудеса Его.