М Е С Я Ц     Я Н В А Р Ь

1. Иже во святых отца нашего Василия Великаго, архиепископа Кессарии Каппадокийския

Величание

Величаем тя, святителю отче Василие, великаго столпа церви и учителя, реки учений православных источившего вселенней.

Псалом общий вселенским святителям:

Услышите сия вси языцы.

2. Святой праведной Иулиании Лазаревской, милостивой Муромско

Величание

Величаем тя, святая праведная Иулиание милостивая, и чтим святую память твою, ты бо присно о милости к нам молиши Всемилостиваго Христа Бога нашего.

Псалом

Весь день милует и взаим дает праведный.

Тебе оставлен есть нищий, сиру Ты буди помощником.

Любит милостыню Господь.

Расточи, даде убогим.

Нищия насыщу хлебом.

Да узрят нищии и возвеселятся, и восхвалят имя Твое.

Милость Твоя, Господи, помогаша мне.

Возверзи на Господа печаль твою, и Той тя препитает.

Се очи Господни на боящихся Его, препитати их в глад.

Весть Господь пути непорочных, не постыдятся во время лютое и во днех глада насытятся. Милостив и щедр, Господь, пищу даде боящимся Его.

Сынове Твои, яко новосаждения масличная, окрест трапезы Твоея.

Праведницы наследят землю, и вселятся в век века на ней.

2. Преподобнаго отца нашего Серафима, Саровскаго чудотворца

Величание

Ублажаем тя, преподобне отче Серафиме, Матери Божией избранниче, ангелов собеседниче и всех притекающих к тебе радосте и утешение.

Псалом

Пойте Господеви преподобнии Его, исповедайте память святыни Его.

В Тебе утвердихся от утробы, от чрева матери моея Ты еси мой покровитель.

Имже образом желает елень на источники водные, сице возжада души моя к Богу.

Се удалихся, бегая, и водворихся в пустыни, чаях Бога спасающаго мя.

Праведник, яко финикс процветет, яко кедр, иже в Ливане, умножится.

Будет, яко древо насажденное при исходищих вод, еже плод свой даст во время свое.

Предзрех Господа предо мною.

Постави на камени нозе мои, и вложи во уста моя пение Богу нашему.

Положи, господи, хранение устом моим.

Положих устом моим хранило, смирихся и умолчах.

Согреяся сердце мое во мне, и в поучении моем возгорится огонь.

Приидите, чада, послушайте мене, страху Господню научу вас.

Ты еси радость моя.

Память твоя в род и род.

7. Собор святаго славнаго пророка, Предтечи и Крестителя Иоанна

Величание

Величаем тя, Крестителю Спасов Иоанне, явление Ангца Божия людем возвестившаго и Сего во струях Иорданских трепотною рукою крестити сподобльшагося.

Псалом

Благословен Господь Бог Израилев, яко посети и сотвори избавление людем Своим.

Ты пророк Вышняго наречешися.

Предъидеши бо пред лицем Господним уготовати пути Его.

Се удалихся, бегая, и водворихся в пустыни.

Розботеют красная пустыни.

Глас вопиющаго в пустыни, уповайте путь Господень.

Помянух тя от земли Иордански.

Господь даст глагол благовествующим силою многою.

Видеша Тя воды, Боже, видеша Тя воды, и убояшася.

Иордан возвратися вспять.

Посети нас Восток с высоты.

Просветити во тьме и сени смертней седящих.

Направити ноги наша на путь мира (Лк. 1, 79)

Яко возвеличишася дела Твоя, Господи, вся премудростию сотворил еси (103, 24).

8. Святаго священномученика Исидора пресвитера и с ним 72-х пострадавших в Юрьеве граде Ливонском

Величание

Величаем тя, священномучениче Исидоре, и чтим честныя страдания Твои, ихже со дружиною твоею за веру православную претерпел еси.

Псалом

Блажен муж, иже не иде на совет нечестивых.

Священницы Твои облекутся правдою, и преподобнии Твои возрадуются.

Молитвы моя Господеви воздам; посреде церкве воспою Тя.

Приидите, чада, послушайте мене, страху Господню научу вас.

Возненавидех церковь лукавнующих, и с нечестивыми не сяду.

Законнопреступных возненавидех, закон же Твой возлюбих.

Уготовихся и не слутихся сохранити заповеди Твоя.

Умножися на мя неправда гордых.

Приближищася гонящии мя беззаконием.

Обышедше обыдоша мя, и именем Господним противляхся им.

Се аз и дети, яже ми даде Бог.(Ис. )

Тебе ради умерщвляемся весь день, вменихомся, яко овцы заколения.

Внидоша воды до души моея.

Проидохом сквозе воду, и извел еси нас в покой.

9. Иже во святых отца нашего Филиппа, митрополита всея Руси

Величание

Величаем тя, святителю отче Филиппе, царя дерзновенно обличавшаго и за правду даже до смерти пострадавшаго, ныне же о Русской земле Богу непрестанно молящагося.

Псалом

Имже образом желает елень на источники водные, сице возжада душа моя к Богу.

Се удалихся, бегая, и водворихся в пустыни, чаях Бога спасающего мя.

Десница Господня вознесе мя. Священницы Твои облекутся правдою, и преподобнии Твои возрадуются.

Приидите, чада, послушайте мене, страху Господню научу вас.

Неправду возненавидех и омерзих, закон же Твой возлюбих. Глаголах о свидениях Твоих пред царями и не стыдяхся.

Неправедно погнаша мя, помози ми.

На Бога уповах, не убоюся, что сотворит мне человек (55, 12).

Благо есть уповати на Господа, нежели уповати на князи.

Тебе ради умерщвляемся.

Праведник, яко финикс процветет, яко кедр, иже в Ливане, умно жится.

Пребудет в век пред Богом.

Хвала Его пребывает в век века.

11. Преподобнаго отца нашего Феодосия, общих житий начальника

Величание и псалом общие по псалтири.

13. Преподобнаго отца нашего Елеазара Анзерскаго

Величание общее преподобному.

Псалом преподобным подвизавшимся на островах:

Господь воцарися, да веселятся острови.

14. Святой равноапостольной Нины, просветительницы Грузии

Величание

Величаем тя, святая равноапостольная Нина, и чтим подвиги и труды твои, имиже в странах Кавказских трудилася еси во благовестии Христове.

Псалом

Дивен Бог во святых своих.

Девы да восхвалят имя Господне.

Видех неразумевающих и истаях.

Истаяла мя есть ревность Твоя, яко забыша словеа Твоя.

Готово сердце мое, Боже, готово сердце мое.

Согреяся сердце мое во мне, и в поучении моем возгорится огнь.

Господь даст глагол благовествующим силою многою.

Провещает язык мой словеса Твоя.

От Господа стопы человеку исправляются.

Стопы моя направи по словеси Твоему.

Глаголах о сновидениях твоих пред царями.

Возвестите во языцех славу Его, во всех людех чудеса Его.

Во всю землю изыде вещание их.

Велий Господь и велия крепость Его. Той даст силу и державу людем своим.

16. Поклонение честным веригам святаго и всехвальнаго апостола Петра

Величание

Величаем тя, святый апостоле Петре, и чтим честныя вериги твои, имиже, яко злодей, за Христа связан был еси.

Псалом

Во всю землю изыде вещание их, и в концы вселенной глаголы их.

Суди, Госопди, обидящих мя, побори борющих мя.

Восташа на мя свидетели неправеднии, яже не ведях вопрошаху мя.

Врази мои душу мою одержаша.

Погна враг душу мою, посадил мя есть в темных.

Смириша во оковах нозе его, железо пройде душа его.

От скорби призвах Господа, и услыша мя в пространство.

Внегда призвати ми, услыша мя Бог правды моея.

Изведи из темницы душу мою.

Господь решит окованных, и узы их растерза.

Ангелом Своим заповедь о Тебе сохранити Тя.

Ополчится ангел Господень окрест боящихся Его и избавит их.

Велий Господь и велия крепость Его, и разума Его несть числа.

Той даст силу и державу людем своим; благословен Бог.

16. Святаго праведнаго Максима, иерея Тотемскаго

Величание

Величаем тя, святый праведный иерее Максиме, и чтим святую память твою, ты бо молиши за нас Христа Бога нашего.

Псалом

Блажени живущий в дому Твоем; в век веков восхвалят Тя.

Священницы Твои облекутся правдою.

Коль возлюбленна селения Твоя Господи сил.

Желает и скончавается душа моя во дворы Господни.

Изволих приметатися в дому Бога моего.

Умыю в неповинных руце мои, и обыду жертвенник Твой, Господи.

Молитвы моя Господеви воздам; посреде церкви воспою Тя.

Воспою имени Твоему во веки, воздати ми молитвы моя день от дне.

Да исправится молитва моя, яко кадило пред Тобою, воздеяния руку моею.

На всяк день благословлю Тя, и восхвалю имя Твое.

Воспою Господеви в жизни моей, пою Богу моему дондеже есмь.

Да усладится Ему беседа моя, аз же возвеселюся о Господе.

Приидите, чада, послушайте мене, страху Господню научу вас.

Радутеся праведнии о Госопде, правым подобает похвала.

17. Преподобнаго и богоноснаго отца нашего Антония Великаго

Величание и псалом общие преподобным во псалтири

18. Иже во святых отец наших Афанасия и Кирилла, архиепископов Александрийских

Величание

Величаем вас, святителие велиции Афанасие и Кирилле, ересей посрамитилие, православия поборницы, Церкви Христовы столпы непоколеблемии.

Псалом общий великим вселенским святителям:

Услышите сия вси языцы.

21. Иконы Пресвятыя Богородицы Ватопедской, именуемой Отрада и Утешение

Величание

Величаем Тя, Пресвятая Дево, и чтим образ Твой святый, егоже во отраду и утешение верным людем даровала еси.

Псалом общий Богородицы второй:

Слыши, Дщи, и виждь.

24. Иже во святых отца нашего Герасима, епископа Великопермскаго

Величание

Величаем тя, святителю отче Герасиме, и чтим равноапостольные труды твоя в земле Зырянской и мученическую Христа ради кончину Твою.

Псалом общий святителю-равноапостолу:

Воскликните Богови вся земля.

25. Иже во святых отца нашего Григория, архиепископа Константиня Града, Богослова

Величание

Величаем тя, святителю отче Григорие, кротости и любви преисполненнаго, глубины богословия изыскавшаго и одеждою православия Церковь украсившаго. Псалом общий великим вселенским святителям:

Услышите сия вси языцы.

25. Иконы Пресвятой Богородицы, именуемой Утоли моя печали

Величание

Достойно есть величати Тя, Богородице, от всякаго зла нас избавляющую и печали наша утоляющую.

Псалом общий Богородице второй:

Слыши, Дщи, и виждь.

26. Преподобных Ксенофонта и Марии и чад их Иоанна и Аркадия

Величание

Ублажаем вас, преподобнии Ксенофонте и Марие, Иоанне и Аркадие, и чтим скорби и болезни ваши о разлучении друг от друга, ихже терпеливо Господа ради понесше, мучеником уподобистеся.

Псалом

Бога нам прибежище и сила, помощник в скорбех, обретших нас зело.

Господь испытает праведнаго.

Скорби сердца моего умножишася.

Скорби и нужды обретоша мя, заповеди Твоя - поучение мое.

Вскую прискорбна еси, душе моя, вскую смущаеши мя? Уповай на Бога.

В день скорби моея Бога взысках.

Ко Господу, внегда скорбети ми, воззвах и услыша мя.

Близ Господь всем призывающим Его.

Явил ми еси многи и злы, и, обращся утешил мя еси.

Обратил еси плач мой в радость мне.

Многи скорби праведным и от всех избавит их Господь.

Сеющии слезами, радость пожнут.

Воззваша праведнии и Господь услыша их, и отвсех скорбей их спасе их.

Пойте Господеви преподобнии Его и исповедайте память святыни Его, во всех людех чудеса Его.

26. Святаго благовернаго Давида Возобновителя, царя Грузинскаго

Величание

Величаем тя, святый и благоверный царю Давиде, и чтим труды твои, ихже во славу Христа Бога и во устроение земле твоея совершил еси.

Псалом общий князю правителю:

Вознесох избраннаго от людей моих.

29. Иже во святых отец наших Герасима, Питирима и Ионы, епископов Великопермских, просветителей зырян

Величание

Величаем вас, святителие Христовы Герасиме, Питириме и Ионо, и чтим равноапостольные труды ваши, имиже в земле Зырянской трудистеся во благовестии Христове.

Псалом святителю-равноапостолу:

Воскликните Богови вся земля.

30. Иже во святых отец наших трех вселенских великих учителей и святителей: Василия Великаго, Григория Богослова и Иоанна Златоустаго

Величание

Величаем вас, трие вселенские велиции учителие и святителие Василие, Григорие и Иоанне, Церкви Христовы столпы непоколебимии, людей православных ко спасению наставницы.

Псалом общий святителям во псалтири:

Аще же изволит настоятель, поем непорочны на три статии, припевающе величания святителем, бывшия в старопечатных псалтирях, к каждому стиху всего псалма или точию к избранным.

Статья 1-я

Величаем тя, святителю Христов Василие, ты бо благочестно Церковь Христову непреклонну соблюл еси.

Блажени непорочнии в пути, ходящии в законе Господни.

Блажени испытающии свидения Его, всем сердцем взыщут Его (118, 7).

В сердце моем скрых словеса Твоя, яко да не согрешу Тебе (118, 11).

Возлюби душа моя возжелати судьбы Твоя на всякое время (118, 20).

И глаголах о свидениях Твоих пред цари и не стыдяхся (118, 46).

Печаль приет мя от грешних, оставляющих закон Твой (118, 53).

Уготовахся и не смутихся, сохранити заповеди Твоя (118, 60).

Благ мне закон уст Твоих, паче тысящ злата и сребра (118, 72).

Статья 2-я

Достойно есть вличати тя, Григорие Богословие, глубины духа изыскавшаго и доброты вещания приявшего.

Руце Твои сотвористе мя, и создасте мя: вразуми мя, и научуся заповедем Твоим (118,73).

Буди сердце мое непорочно во оправданиих Твоих, яко да не постыжуся (118, 80).

По милости Твоей живи мя, и сохраню свидения уст Твоих (118, 88).

Твой есмь аз, спаси мя: яко оправданий Твоих взысках (118, 94).

Коль возлюбих закон Твой, Господи, весь день поучение мое есть (118, 97). Коль сладка гортани моему словеса Твоя: паче меда устом моим (118, 103).

Сего ради ко всем заповедем, Твоим направляхся, всяк путь неправды возненавидех (118, 128).

Уста моя отверзох, и привлекох дух, яко заповедей Твоих желах (118, 131).

Статья 3-я

Роди вси песньми покаяния проповедника Златоустаго Иоанна блажим.

Призри на мя и помилуй мя, по суду любящих имя Твое (118, 132).

Истаяла мя есть ревность Твоя, яко забыша словеса Твоя врази мои (118, 139).

Воззвах всем сердцем моим, услыши мя, Господи, оправдания Твоя взыщу (118, 145).

Приближашася гонящии мя беззаконием: от закона же Твоего удалишася (118, 150).

Мнози изгонящии мя и стужающии ми: от свидений Твоих не уклонихся (118, 157).

Возрадуюся аз о словесех Твоих яко обретаяй корысть многу (118, 162).

Провещает язык мой словеса Твоя, яко все заповеди Твоя правда (118, 172).

Заблудих яко овча погибшее: взыщи раба Твоего, яко заповедей Твоих не забых (118, 176).

Слава:

Величаем вас трие вселенские велиции учителие и святилие Василие, Григорие, и Иоанне, церкви Христовы столпи непоколебимии, людей православных ко спасению наставницы.

И ныне: тоже величание

Аллилуия: трижды, и паки

Величаем вас, трие вселенские велиции учителие...