М Е С Я Ц    М А Р Т

2. Иконы Пресвятой Богородицы, именуемой Державная

Величание

Достойно есть величати Тя, Богородице, земли Русской Царицу Небесную и людей православных Владычицу Державную.

Псалом

Предста Царица одесную Тебе.

Слыши, Дщи, и виждь, и приклони ухо Твое.

Держава моя и прибежище мое еси Ты.

Державу мою к Тебе сохраню.

Достояние мое державно есть мне.

Утверждение мое и прибежище мое еси Ты.

Ты еси крепость моя.

Прибежище мое в день скорби моея.

Призри на мя и помилуй мя.

Спаси мя милостию Твоею.

По множеству болезней моих в сердце моем; утешения Твоя возвеселиша душу мою.

Скоро да предварят нас щедроты Твоя, яко обнищахом зело.

Радосте моя, избави мя от обышедших мя.

Воспою имени Твоему во веки , воздати ми молитвы моя день от дне.

4. Преподобнаго и благовернаго князя Даниила Московскаго

Величание

Ублажаем тя, преподобне и благоверне княже Данииле, и чтим труды твои, ихже во славу Божию и во устроение града Москвы совершил еси.

Псалом

Блажен муж бояйся Господа, сильно на земли будет семя его.

Закон Бога его в сердце его, и не запнутся стопы его.

Постави его господином дому своему и князем всему стяжанию своему.

Божии державнии земли зело вознесошася.

Раб Твой есть аз, вразуми мя.

Аще не Господь созиждет дом, всуе трудишася зиждущии.

Аще не Господь сохранит град всуе бде стрегущий.

Освятил есть селение свое Вышний.

Благословен Господь, яко удиви милость свою во граде ограждения.

Господи, возлюбих благолепие дому Твоего.

Господь в роде праведных.

Род правых благословится.

Восхвалятся преподобнии во славе.

Слава сия будет всем преподобным Его.

4. Святаго благовернаго князя Василия Ростовскаго

Величание

Величаем тя, святый благоверный княже Василие, за веру и отечество и за люди души Твою положившаго.

Псалом князю мученику, пострадавшему от неверных:

Бог нам прибежище и сила.

7. Святых священномучеников в Херсоне епископствовавших: Василия, Ефрема, Капитона, Евгения, Еферия, Елпидия и Агафодора

Величание

Величаем вас, священномученицы седмочислении в Херсоне епископствовашие и землю нашу кровьми своими освятившии.

Псалом общий священномученику:

Священницы Твои облекутся в правду.

7. Иконы Пресвятой Богородицы, именуемой Споручница грешных

Величание

Достойно есть величати Тя, Богородице, руце Твои в поручение о грешных к Сыну Твоему простирающую.

Псалом общий Богородицы второй:

Слыши, Дши, и виждь.

9. Святых четыредесяти мученик в Севастийском езере мучившихся

Величание

Величаем вас страстотерпцы святые четыредесять, и чтим честныя страдания ваши, ихже за Христа претерпесте.

Псалом

Бог нам прибежище и сила, помощник в скорбех обретших нас зело.

Искусил еси нас Боже, разжегл еси нас, яко же разжигается сребро.

Тебе ради умерщвляемся, вменихомся яко овцы заколения.

Мужайтесь, и да крепится сердце Ваше, вси уповающии на Господа.

Спаси мя, да избавлюся от ненавидящих мя, и от глубоких вод.

Спаси мя, Боже, яко внидоша воды до души моея (68, 2).

Поток прейде душа наша (123, 4).

Посли руку Твою с высоты, изми мя и избави мя от вод многих, из руки сынов чуждых (143, 7).

Низпосла с высоты, и прият мя, восприят мя от вод многих.

Проидохом сквозе огнь и воду, и извел еси нас в покой.

Положил еси на главах их венцы.

Возвеличил есть Господь сотворити с нами, быхом веселящеся.

Ты, Господи, сохраниши нас, и соблюдеши нас от рода сего и во век.

Святым, иже суть на земли Его, удиви Господь вся хотения своя в них.

9. Иконы Пресвятой Богородицы, именуемой Албазинская.

Величание

Величаем тя, Пресвятая Дево, и чтим образ Твой святый, егоже во утешение людей православных в восточных концах Русской земли прославила еси.

Псалом общий Богородице третий:

Исповемся Тебе всем сердцем моим.

14. Иконы Пресвятой Богородицы, именуемой Феодоровская

Величание

Величаем Тя, Пресвятая Дево, и чтим образ Твой святый, егоже в благословение и покров граду Костроме и всей Русской земле даровала еси.

Псалом общий Богородице первый:

Возвеселюся и возрадуюся о Тебе.

17. Святаго праведнаго Алексия, человека Божия

Величание

Ублажаем тя, человече Божий Алексие, и чтим святую память твою, ты бо молиши за нас Христа Бога нашего.

Псалом

Блажен муж, иже не призре в суеты и неистовления ложная.

Лучше малое праведнику, паче богатств грешных многа.

На пути свидений Твоих насладился, яко о всяком богатстве.

Благ мне закон уст Твоих, паче тысящ злата и сребра.

За словеса устен Твоих аз сохраних пути жестоки.

Отврати очи мои, еже не видети суеты.

Се удалихся бегая, чаях Бога спасающаго мя.

Пресельник аз есмь у Тебе и пришлец.

Тебе ради потерпех поношение, покры срамота лице мое.

Положих одеяние мое вретище, и бых им в притчу.

Облачахся во вретище и смирях постом душу мою.

Слезами моими постелю мою омочу.

Сеющий слезами, радостию пожнут.

Возвеселится праведник о Господе, и уповает на Него, и похвалятся вси правии сердцем.