М Е С Я Ц     М А Й

1. Святой благоверной Тамары, царицы Грузинской

Величание

Величаем тя, святая благоверная царица Тамара, и чтим подвиги и труды твои, ихже во славу Христа Бога и во устроение земли твоей совершила еси.

Псалом праведной жене:

Предзрех Господа предо мной.

2. Иже во святых отца нашего Афанасия, архиепископа Александрийскаго, Великаго.

Величание

Величаем тя, святителю отче Афанасие, злословия терние искренившаго, учения же православия насадившаго и Сына Божия Отцу и Духу единосущна проповедавшаго.

Псалом общий великим вселенским святителям:

Услышите сия вси языцы.

3. Преподобнаго отца нашего Феодосия, игумена монастыря Печерскаго и начальника в Русской земле монашескаго общаго жития

Величание

Ублажаем тя преподобне отче Феодосие, и чтим святую память твою, Ангелов собеседниче и общаго монашеского жития в Русской земли первоначальниче.

Псалом общий преподобному:

Терпя потерпех Господь.

6. Святаго праведнаго Иова Многострадальнаго

Величание

Величаем тя, святый праведный Иове, и чтим скорби и болезни твоя, ихже со благодарением Господа ради претерпел еси.

Псалом

Блажен муж, иже не иде на совет нечестивых, и на пути грешных не ста.

Блажен разумеваяй на нища и убога, в день лют избавит его Господь.

Господь испытает праведнаго.

Уста льстиваго на мя отверзошася, глаголаша на мя языком льстивым.

Сие дело оболгающих мя у Господа, и глаголющих лукавое на душу мою.

Изчезе в болезни жизнь моя, изнеможе нищетою крепость моя, кости моя смятошася.

Вси видящии мя поругашася ми, глаголаша устами, покиваша главою.

Бых поношение соседом моим, и страх знаемым моим, видящии мя вон бежаша от мене.

Аз же всегда возуповаю на Тя, и приложу на всяку похвалу Твою.

Ты же, Господи, не удали помощь Твою от мене, на заступление мое вонми.

Явил ми еси скорби многи и злы, и обращься оживотворил мя еси.

Жена твоя, яко лоза плодовита, сынове твои, яко новосаждения масличная окрест трапезы твоея.

Се тако благословится человек бояйся Господа.

В память вечную будет праведник.

7. Преподобнаго отца нашего Нила Сорскаго

Величание

Ублажаем тя, преподобне отче Ниле, и чтим святую память твою, ангелов собеседниче, монахов наставниче и совершеннейшаго нестяжания ревнителю.

Псалом общий преподобному:

Терпя потерпех Господи.

10. Святаго апостола Симона Зилота

Величание

Величаем Тя, апостоле Христов Симоне, и чтим болезни и труды твои, имиже в пределах отечества нашего и во иных странах трудился еси во благовестии Христове.

Псалом общий апостолу:

Небеса поведают славу Божию.

11. Святый равноапостольных Мефодия и Кирилла, учителей Словенских

Величание

Величаем вас, святии равноапостольнии Мефодие и Кирилле, все словенския страны ученьми вашими просветивших и ко Христу приведших.

Псалом

Воскликните Богови вся земля.

От восток солнца до запад хвально имя Господне.

Возвестите во языцех славу Его, во всех людех чудеса Его.

Видех неразумевающих и истаях.

Истаяла мя есть ревность Твоя, яко забыша словеса Твоя.

Исповемся Тебе во языцех, Господи.

Провещает язык мой словеса Твоя.

Господь даст глагол благовествующим силою многою.

Глаголах о свидениях Твоих пред царями и не стыдяхся.

Священницы Твои облекутся правдою и преподобнии Твои возрадуются.

Приидите, чада, послушайте мене, страху Господню научу вас.

Повем имя Твое братии моей.

Во всю землю изыде вещание их.

Пойте Господеви преподобнии Его, и исповедайте память святыни Его, во всех людех чудеса Его.

11. Иже во святых отца нашего Иосифа убиеннаго, митрополита Астраханскаго

Величание общее святительское.

Псалом

Священницы Твои облекутся правдою и преподобнии Твои возрадуются.

Господи, возлюбих благолепие дому Твоего, и место селения славы Твоея.

Молитвы моя Господеви воздам пред всеми людьми Его, во дворех дому Господня.

Повем имя Твое братии моей, посреде церкви воспою Тя.

Приидите, чада, послушайте мене, страху Господню научу вас.

Уста мои возвестят правду Твою, весь день спасение Твое.

Законопреступных возненавидех, закон же твой возлюбих.

Законопреступницы восташа на мя, и сонм державных взыскаша душу мою.

Умножися на мя неправда гордых.

Приближишася гонящии мя беззаконием.

Обыдоша мя пси мнози, сонм лукавых одержаша мя.

Аз на раны готов.

Тебе ради умерщвляемся.

Блажени живущии в дому Твоем: во веки веков восхвалят Тя.

12. Святаго священномученика Ермогена Патриарха Московскаго и преподобнаго Дионисия архимандрита Радонежскаго

Величание

Величаем вас, священномучениче Ермогене и преподобне Дионисие, и чтим подвиги и труды ваши, имиже вы в годину смуты за православие и за Русь Святую подвизастеся.

Псалом

Священницы Твои облекутся правдою и преподобнии Твои возрадуются.

Весть Господь путь непорочных и достояние их в век будет.

Отцы наши поведаша нам, возвещающе хвалы Господни, и силы Его и чудеса Его, яже сотвори.

Приидоша языцы в достояние Твое, поядоша Иакова, и место его опустошиша.

Положил еси нас в пререкание соседом нашим, и врази наши подражниша нас.

Благословен Господь, иже не даде нас в ловитву зубам их.

Боже, отринул еси нас, и низложил еси нас, разгневался еси, и ущедрил еси нас.

Спасл еси нас от стужающих нам, и ненавидящих нас посрамил еси.

Якоже щедрит отец сыны, ущедри Господь боящихся Его.

Не отринет Господь людей своих, и достояния своего не оставит.

Господь крепость людем своим даст, Господь благословит людей своих миром.

Благоволил еси Господи землю Твою, возвратил еси плен Иаковль.

Душа наша, яко птица, избавится от сети ловящих; сеть сокрушися и мы избавлени быхом.

Пойте Господеви преподобнии Его, исповедайте память святыни Его, во всех людех чудеса Его.

Где празднуется одному священномученику Ермогену:

Величание

Величаем тя, священномучениче Ермогене, и чтим подвиги и труды твоя, имиже в годину смуты за православие и за Русь святую потрудился еси.

Где празднуется одному преподобному величание и псалом ему общие преподобнические.

13. Святой праведной Гликерии, Новгородской

Величание и псалом общие праведной деве.

15. Святаго благовернаго царевича Димитрия, Угличскаго

Величание

Величаем тя, страстотерпче святый царевичу Димитрие, и чтим святую память твою, ты бо молиши за нас Христа Бога нашего.

Псалом

Хвалите, отроци Господа, хвалите имя Господне.

Князи и юноши да восхвалят имя Господне.

Десница Господня вознесе мя.

Ты восприял мя еси от чрева матери моея.

В Тебе утвердихся от утробы, от чрева матери моея.Ты еси мой покровитель.

Ты еси упование мое от сосцев матери моея.

К Тебе привержен если от ложесн, от чрева матери моея Бог мой еси, Ты.

Законопреступницы восташа на мя.

Ненавидением неправедным возненавидеша мя.

Уловиша душу мою, нападоша на мя крепции.

Тебе ради умерщвляемся, вменихомся, яко овцы заколения.

Мене же за незлобие приял, и утвердил мя еси пред Тобою в век.

Сотвори со мною знамение во благо.

Хвалу Господню вохглаголют уста моя в век и в век века.

17. Преподобной и благоверной великой княгини Евдокии, во инокинех Ефросинии, Московской

Величание

Ублажаем тя, преподобная и благоверная великая княгиня Евдокие, и чтим память твою, ты бо молиши за нас Христа Бога нашего.

Псалом преподобной жене:

Терпя потерпех Господа.

19. Преподобнаго и благовернаго князя Иоанна, Углицкаго, во иноцех Игнатия, Вологодскаго чудотворца

Величание

Ублажаем тя, преподобне и благоверне княже Иоанне, злострадания и терпения образ, монашеских подвигов ревнителя и ангелов собеседника.

Псалом

Князи да восхвалят имя Господне.

Десница Господня вознесе мя.

Уготовихся и не смутихся сохранити заповеди Твоя.

Благо мне, яко смирил мя еси.

Изгонящии мя обыдоша мя.

Умножися на мя неправда гордых.

Ближнии мои отдалече мене сташа, и нуждахуся ищущии душу мою.

Смирил есть в землю жизнь мою посадил мя есть в темных, и уны во мне дух мой.

В день скорби моея Бога взысках руками моими.

Пролию пред Ним моление мое, печаль мою пред Ним вознещу.

Потерпи Господа, и сохрани путь Его, и вознесет Тя, еже наследити землю. Помянух судьбы Твоя от века, Господи, и утешихся.

Помянух Бога и возвеселихся.

Восхвалятся преподобнии во славе и возрадуются на ложах своих.

20. Святаго благовернаго князя Довмонта, нареченнаго во святом крещении Тимофея, Псковскаго

Величание

Величаем тя, святый благоверный княже Довмонте, отеческое нечестие оставльшаго и на святой Руси во славу Христа Бога и во устроение псковской земли потрудившагося.

Псалом

Всем сердцем моим взысках Тебе.

Пути Твоя, Господи, скажи ми.

От Господа стопы человеку исправляются.

Благословлю Господа вразумившаго мя.

Чужд бых братии моей, удалихся бегая.

Пресельник аз есмь у Тебе и пришлец.

Десница Господня вознесе мя.

Постави мя князем стяжанию своему.

Множицею брашася со мною, и не премогаша мя.

Господи, Господи, сило спасения моего, осенил еси над главою моею в день брани.

Пожену врагов моих, и постигну их, и не возвращуся дондеже скончаются.

Благословен Господь Бог мой, научаяй руце мои на ополчение, персты моя на брань (143, 1).

О Тебе похвала моя, в церкви велицей исповемся Тебе.

Князи и вси людие да восхвалят имя Господне.

21. Святых великих царей и равноапостолов Константина и Елены

Величание

Величаем вас, святии равноапостольнии царие Константине и Елено, идолов отвергших и вся концы земли ко Христу приведших.

Псалом

1. Боже, песнь нову воспою Тебе, дающему спасение царям.

2. Бог Богов, Господь глагола, и призва землю.

1. Возвестиша небеса правду Его, и видеша вси людие славу Его.

2. Небеса поведают славу Божию.

1. Сказа Господь спасение Свое, пред языки откры правду Свою.

2. Вознесох избраннаго от людей моих, елеем святым моим помазах его.

1. Аз первенца положу его, высока паче царей земных.

2. Господи, силою Твоею возвеселится царь, и о спасении Твоем возрадуется зело.

1. Предста царица одесную Тебе.

2. Царие земстии и вси людие, князи и вси судии земстии да восхвалят имя Господне.

1. Да исповедятся Тебе, Господи, вси царие земстии, яко услышаша вся глаголы уст Твоих.

2. Царие разумейте, работайте Господеви со страхом, и радуйтеся ему с трепетом.

1. Обратятся ко Господу вси концы земли, и поклонятся пред Ним вся племена язык.

2. Царства, земная, пойте Богу, воспойте Господеви, Той даст силу и державу людем своим. Благословен Бог.

21. Иконы пресвятой Богородицы, именуемой Владимирская

Величание

Величаем тя, Пресвятая Дево, и чтим святую икону Твою Владимирскую, Тобою от лет древних в благословение и покров Русской земли дарованную.

Псалом

1. Да исполнятся уста моя хваления Твоего, яко да воспою славу Твою.

2. Слыши, Дщи, и виждь, и приклони ухо Твое.

1. Просвети лице Твое на нас и помилуй нас.

2. Лицу Твоему помолятся богатии людстии.

1. Помолихся лицу Твоему всем сердцем моим.

2. На Тя упова душа моя, и на сень крыл Твоих надеюся.

1. В крове крыл Твоих покрыеши мя.

2. Возрадуются и возвеселятся о Тебе вси ищущии Тебе.

1. Людие Твои возвеселятся о Тебе.

2. На людех Твоих благословение Твое.

1. Возрадуемся о спасении Твоем.

2. Воспоем и поем силы Твоя 1. Вся земля да поклонится Тебе, и поет Тебе, да поет же имени Твоему.

2. По всей земли слава Твоя.

21. Святых благоверных князей Константина и чад его Михаила и Феодора, Муромских

Величание

Величаем вас, святии благовернии князие Константине, Михаиле и Феодоре, и чтим подвиги и труды ваша, ихже во славу Христа Бога и во устроение Муромской земли совершисте.

Псалом общий князю правителю:

Вознесох избранные от людие моих.

23. Иже во святых отца нашего Леонтия, епископа Ростовскаго

Величание

Величаем тя, святителю отче Леонтие, и чтим равноапостольные труды твоя, имиже в Ростове Великом трудился еси во благовестии Христове.

Псалом святителю равноапостолу:

Воскликните Богови вся земля.

23. Преподобной и благоверной княжны Евросинии Полоцкой.

Величание

Ублажаем тя, преподобная и благоверная княжна Евфросиние, и чтим святую память твою, ты бо молиши за нас Христа Бога нашего.

Псалом преподобной деве:

Приведутся Царю девы, приведутся в веселии и радовании, введутся в храм Царев.

24. Преподобнаго отца нашего Никиты столпника, Переславскаго чудотворца

Величание и псалом общие преподобному

Псалом

Блажени, ихже оставишася беззакония, и ихже прикрышася грехи. Беззакония моя превзыдоша главу мою, яко бремя тяжкое отягоша на мне.

Сотвори со мною знамение во благо.

Ко мне самому душа моя смятеся, сего ради памянух Тя.

Сотворити волю, Боже, восхотех.

Се удалихся бегая, чаях Бога спасающего мя (54, 8, 9). Изволих приметатися в дому Бога моего паче, неже жити ми в селениих грешничих.

Покрых постом душу мою, утрудихся воздыханием моим, слезами моими постелю мою омочу.

Полунощи востах исповедатися Тебе, седмерицею днем хвалих Тя.

На камень вознесл мя еси, был еси упование мое, столп крепости моея.

Искусил еси нас, Боже разжегл еси нас, якоже разжигается сребро.

Тебе ради умерщвляемся, вменихомся, яко овцы заколения.

Честна пред Господем смерть преподобных Его.

Пойте Господеви преподобнии Его, и исповедайте памяти святыни Его, во всех людех чудеса Его.