М Е С Я Ц    О К Т Я Б Р Ь

1. Покров Пресвятой Богородицs

Величание

Величаем Тя, Пресвятая Дево, и чтим Покров Твой честный, Тя бо виде святый Андрей на воздухе за мир Христу молящуюся.

Псалом

1. Воспойте Господевы песнь нову, яко дивна сотвори Господь.

2. Предста Царица одесную Тебе.

1. Слыши Дщи и виждь и приклони ухо Твое.

2. Плещма своима осенит Тя.

1. Послет Ти помощь от святаго и от Сиона заступит тя.

2. В крове крил Твоих покрыеши мя.

1. Распростре облак в покров им.

2. Сынове человечестии в крове крил Твоих надеятися имут.

1. Покрыюся в крове крил Твоих.

2. На сень крил Твоих надеюся.

1. В крове крил Твоих возрадуюся.

2. Слышану сотвори мне заутра милость Твою, яко на Тя уповах.

1. Воспою силу Твою и возрадуюся о милости Твоей.

2. Помяну имя Твое во всяком роде и роде.

1. Преподобнаго отца нашего Романа сладкопевца

Величание и псалом общие песнописцу преподобному

2. Преподобной и благоверной великой княгини Анны Кашинской

Величание

Ублажаем Тя, преподобная и благоверная великая Княгине-инокине Анно, и чтим многия скорби твои и терпение, имиже дерзновение у Господа стяжавши, присно молиши за нас Христа Бога нашего.

Псалом

Многи скорби праведным.

Явил ми еси скорби многи и злы.

Скорби сердца моего умножишася.

Утрудихся воздыханием моим, слезами моими постелю мою омочу.

От гласа воздыхания моего прильпе кость моя плоти моей.

Скорби и нужды обретоша мя, заповеди Твоя - поучение мое.

В день скорби моея Бога взысках.

Внегда скорбети ми, призвах Господа и к Богу моему воззвах.

Пролию пред ним моление мое, печаль мою пред Ним возвещу.

Услыши молитву мою Господи, и моление мое внуши, слез моих не премолчи.

В день озлобления моего бысть Господь утверждение мое.

Бог нам прибежище и сила, помощник в скорбех, обретших нас зело.

Сеющии слезами, радостию пожнут.

Пойте Господеви преподобнии Его, исповедайте память святыни Его, во всех людех чудеса Его.

4. Святаго благовернаго князя Владимира Новгородского

Величание

Величаем тя, святый благоверный княже Владимире, пречудного храма Софии-Премудрости Божией здателя, и чтим труды твои их же во славу Христа Бога и во устроении Великого Нова Града совершил еси.

Псалом общий князю правителю:

Вознесох избранного от людей моих.

4. Иже во святых отец наших Гурия, архиепископа Казанского и Варсонофия, епископа Тверскаго

Величание

Величаем вас, святители Христовы Гурие и Варсонофие, и чтим равноапостольные труды ваши, имиже в граде Казани трудистеся во благовестии Христове.

Псалом общий святителю - равноапостолу:

Воскликните Богови вся земля.

5. Иже во святых отец наших святителей Московских: Петра, Алексия, Ионы, Филиппа митрополитов и священномученика Ермогена-Патриарха, всея России чудотворцев

Величание

Величаем вас, первопрестольницы Российские Петре и Алексие, Ионо, Филиппе и Ермогене, и чтим святую память вашу, Русской земли нашей неусыпных хранителей и молитвенников.

Псалом

1. Боже, ушима нашима услышахом и отцы наши возвестиша нам дело, еже соделал еси во днех древних.

2. На Тя уповаша и избавил еси их.

1. К тебе воззваша и спасошася, на Тя уповаша и не постыдешася.

2. Воззваша ко Господу, всегда скорбети им, и от нужды их спас их.

1. Боящиеся Господа уповаша на Господа: Помощник и Защититель им есть.

2. Призываху Господа и Той послушаше их, яко храняху заповедь Его и повеления его. 1. Господи Боже наш, Ты послушай еси их; Боже, Ты милостив бывал еси им.

2. Велий Господь и хвален зело, во граде Бога нашего, благокоренным радованием всея земли.

1. Град Царя Великаго, Бог в храмех Его.

2. Яко избра Господь его в жилище себе.

1. Священники его облеку во спасение и преподобнии его радостию возрадуются.

2. Не нам, Господи, не нам, но имени твоему даждь славу о милости Твоей.

1. Буди, Господи, милость Твоя на нас, якоже уповахом на Тя.

2. Пробави милость Твою ведущим Тя.

5. Преподобной и благоверной Харитины, княгини Литовской

Величание

Ублажаем тя, преподобная и благоверная княжно Харитино, и чтим святую память твою, ты бо молиши за нас Христа Бога нашего.

Псалом преподобной девы:

Приведутся Царю девы, приведутся в веселии и радовании, введутся в храм Царев.

8. В первый воскресный день после 7-го октября память творим богоносных отцев Святаго и Вселенскаго седьмаго Собора

Величание

Величаем вас, богоноснии отцы, христианоненавистных иконоборцеы от Христовы Церкви соборне отгнавших и святым иконам благочестно поклонятися научивших.

Псалом

Приидите возрадуемся Господеви, предварим лице Его во исповедании.

Бог прославляем в совете святых.

Соберите ему преподобныя Его, завещающия завет Его о жертвах.

От стран собора их, от восток и запад, и севера и моря.

Тамо седоша престоли на суд.

Да не пребудет Тебе престола беззакония.

Законопреступных возненавидех, закон же твой возлюбих.

Воздвигни руце Твои на гордыни их в конец, елика лукавнова враг во святом Твоем.

Господь праведен, ссече выи грешников.

Господи, возлюбих благоление дому Твоего.

Ревность дому Твоего снеде мя.

Лицу Твоему помолятся богатии людстии.

Благословен Господь Бог Израилев, творяй чудеса Един.

И благословенно имя славы Его во век и в век века.

11. Преподобнаго отца нашего Феофана Начертанннаго, епископа Никейскаго, творца канонов

Величание и псалом общие песнописцу святителю.

12. Преподобнаго отца нашего Косьмы святоградца, епископа Маиумскаго, творца канонов

Величание и псалом общие песнописцу святителю.

13. Иконы Пресвятой Богородицы, именуемой Иверская

Величание

Величаем Тя, Пресвятая Дево, и чтим образ Твой святый, егоже обители Иверской и граду Москве, яко вратарницу, и всей Русской земле - благодатное сокровище даровала еси.

Псалом

1. Помяну имя Твое во всяком роде и роде.

2. Чудна дела Твоя.

1. В мори путие Твои, и стези Твои в водах многих.

2. Чудеса показа облаком во дни, и всю нощь просвещением огня.

1. Посли свет Твой и истину Твою, тии мя наставиша и введоша мя в гору святую Твою и в селения Твоя.

2. Возведох очи моя в горы, отнюдуже приидет помощь моя.

1. Укрепи вереи врат Твоих.

2. Се не воздремлет, ниже уснет храняй Израиля.

1. Сохранит вхождение Твое и исхождение Твое.

2. Призови мя в день скорби твоея, и изму тя, и прославиши Мя.

1. На Тя уповах, да не постыжуся во век.

2. Возвеселятся вси уповающии на Тя, и вселишися в них.

1. Похвалятся о Тебе любящии имя Твое.

2. В род и род возвестим хвалу Твою.

14. Преподобнаго и благовернаго Николы Святоши, князя Черниговскаго

Величание и псалом общие князю - иноку.

20. Святаго праведнаго Артемия отрока Веркольскаго

Величание

Величаем Тя, святый праведный Артемие, и чтим святую память твою, ты бо молиши за нас Христа Бога нашего.

Псалом

Радуйтеся праведнии о Господе.

Хвалите отроцы Господа, хвалите имя Господне.

В Тебе утвердихся от утробы, от чрева матери моея, Ты еси мой покровитель.

Ты восприял мя еси от чрева матери моея.

Ты еси упование мое от сосцев матере моея.

К Тебе привержен есть от ложесн, от чрева матери моея Бог мой еси Ты.

Вместо отец Твоих быша сынове Твои.

Господь любит праведников.

Весть Господь путь праведных.

Всякия кончины видех конец, широка заповедь Твоя зело.

Мене же за незлобие приял, и утвердил мя еси пред Тобою в век.

Сотвори со мною знамение во благо.

Праведницы наследят землю.

И похвалятся вси правии сердцем.

22. Иконы Пресвятой Богородицы, именуемой Казанская

Величание

Величаем Тя, Пресвятая Дево, и чтим образ Твой святый, имже в годину смуты град Москву и всю Русскую землю спасла еси.

Псалом

Слыши, Дщи, и виждь, и приклони ухо Твое.

Боже, приидоша языцы в достояние Твое.

Быхом поношение соседом нашим.

Предста Царица одесную Тебе.

Господь речет мир на людей Своих, и на преподобных Твоих, и на обращающих сердца к Нему.

Благоволил еси, Господи, землю Твою, возвратил еси плен Иаковль.

Оставил еси беззакония людей Твоих, покрыл еси вся грехи их.

Ты людей смиренных спасеши и очи гордых смириши.

Боже, Ты обращься оживиши нас, и людие Твои возвеселятся о Тебе.

Воздвигни силу Твою и прииди спасти нас.

Возврати, Господи, пленение наше, яко потоки югом.

О имени Твоем уничижим возстающих на нас.

Исповемыся Тебе во век, в род и род возвестим хвалу Твою.

Помяну имя Твое во всяком роде и роде.

24. Иконы Пресвятой Богородицы, именуемой Всех скорбящих радость

Величание

Достойно есть величати Тя, Богородице, всех скорбящих радость и обидимых Заступницу.

Псалом общий Богородицы второй:

Слыши Дщи и виждь...

26. Святаго и славнаго великомученика Димитрия мироточца, Солунскаго

Величание

Величаем тя, страстотерпче святый Димитрие, народов словенских отечестволюбца и дерзновеннаго о них пред Господом предстателя и заступника.

Псалом общий мученику.

27. Преподобнаго отца нашего Нестора, летописца Печерскаго

Величание

Ублажаем Тя, преподобне отче Несторе, и чтим святую память твою, монашеских подвигов ревнителю, и летописания в Русской земле первоначальниче.

Псалом

Терпя потерпех Господа, и услыша молитву мою.

Покрых постом душу мою.

Утрудихся воздыханием моим, слезами моими постелю мою омочу.

Поучахся в заповедях Твоих, ихже возлюбих зело.

Помянух дни древния.

Помыслих дни первыя, и лета вечныя помянух, и поучахся.

Отцы наша возвестиша нам дело, еже соделал еси во днех их, во днех древних.

Отцы наша поведаша нам, возвещающе хвалы Господни, и силы Его, и чудеса Его, яже сотвори, сказати о них сыновом своим.

Повесте в роде ином, яко Той есть Бог наш в век, и в век века, Той упасет нас во веки.

Да напишется сие в род ин.

Возвещу мышцу Твою роду всему грядущему, да не забудут дел Божиих.

Милости Твоя, Господи, в век воспою, в род и род возвещу истину Твою.

Да познает род ин, сынове родящиеся, и поведят о них сыновом своим.

Пойте Господеви преподобнии Его, исповедайте память святыни Его, во всех людех чудеса Его.

27. Святаго благовернаго князя Андрея Смоленскаго, Переславскаго чудотворца

Величание

Величаем тя, святый благоверный княже Андрее, и чтим святую память твою, ты бо молиши за нас Христа Бога нашего.

Псалом

Блажен муж бояйся Господа, в заповедех Его восхощет зело.

Постави его господином дому своему и князем всему стяжанию самому.

Раб Твой есмь аз, вразуми мя.

Отврати очи мои еже не видети суеты.

Пришлец аз есть на земли.

Чужд бых братии моей.

Се удалихся, бегая.

Едино просих от Господа, то взыщу, еже жити ми в дому Господни во вся дни жизни моея.

Желает и скончавается душа моя во дворы Господни.

Изволих приметатися в дому Бога моего.

Смирях постом душу мою, утрудихся воздыханием моим.

Свет возсия праведнику, и правым сердцем веселие.

Праведник яко финикс процветет.

В память вечную будет праведник.