М Е С Я Ц    С Е Н Т Я Б Р Ь

1. Иконы Пресвятыя Богородицы, именуемой Всеблаженная

Величание

Достойно есть величати Тя, Пресвятая Дево, Всеблаженную и Пренепорочную, и Матерь Бога нашего.

Псалом общий Богородице первый:

Возвеселюся и возрадуюся о Тебе.

24. Святаго пророка и Боговидца Моисея

Величание

Величаем тя, святый пророче и Богородче Моисее, и чтим святую память твою, ты бо молиши за нас Христа Бога нашего.

Псалом

1. Блажен муж бояйся Господа, в заповедех Его восхощет зело.

2. Моисей и Аарон призываху Господа и Той послушаше их.

1. Господи, Боже наш, Ты послушал еси их, Боже, Ты милостив бывал еси им.

2. Посла Моисея, раба Своего, Аарона, его же избра Себе.

1. Положи в них словеса знамений Своих и чудес Своих в земли Хамове.

2. Сказа пути Своя Моисеови, сыновом Израилевым хотения Своя.

1. Сотвори чудеса в земли Египетстей и изведе их с сребром и златом.

2. Наставил еси яко овцы, люди Твоя рукою Моисеовою и Ааронею.

1. Разверзе море и проведе их.

2. Настави их облаком во дни и всю мощь просвещением огня.

1. Разверзе камень в пустыни и изведе воду из камене.

2. Одожди им манну ясти, и хлеб небесный даде им, хлеб ангельский яде человек.

1. Моисей, избранный Его, стал в сокрушении пред Ним, возвратити ярость Его, да не погубит их.

2. И вменися ему в правду в род и род до века.

4. Иконы Пресвятыя Богородицы, именуемой Неопалимая Купина.

Величание

Величаем тя, Пресвятая Дево, и чтим образ Твой святый, имже от огненнаго запаления нас избавляеши и пламень страстей наших угашаеши.

Псалом общий Богородице первый:

Возвеселюся и возрадуюся о Тебе.

5. Святых и праведных 3ахарии и Елизаветы, родителей Предтечевых

Величание

Величаем вас, святии праведнии Захарие и Елизавето, и чтим святую память вашу, вы бо молите за нас Христа Бога нашего.

Псалом

1. Веселитеся о Господе и радуйтеся праведнии.

2. Многи скорби праведным и от всех их избавит я Господь.

1. Господь испытает праведнаго.

2. Внегда скорбети ми призвах Господа и к Богу моему воззвах.

1. Призре на молитву смиренных и не уничижи моления их.

2. Сеющие слезами, радостию пожнут.

1. Обратил еси плач мой в радость мне.

2. Кто, яко Господь Бог наш, на смиренных призираяй, вселяя не плодовь в дом, матерь, о чадех веселящуся.

1. Благословен Господь Бог Израилев, яко посети и сотвори избавление людем Своим.

2. И воздвиже нам рог спасения в дому Давидове отрока Своего.

1. Сотворити милость со отцы нашими, помянути завет святый Свой.

2. И ты, отроча, пророк Вышняго наречешися, предидеши бо пред лицем Господним уготовати пути Его.

1. Просветити во тьме и сени смертней седящия.

2. Направити ноги наша на путь мирен.

6. Воспоминание чуда Архистратига Михаила, бывшаго в Хонех

Величание

Величаем тя, святый Архистратиже Михаиле, и чтим бывшее в Хонех преславное чудотворение твое.

Псалом

1. Исповемся Тебе, Господи, всем сердцем моим, и пред ангелами воспою Тебе.

2. Творяй ангелы Своя духи, и слуги Своя пламень огненный.

1. Благословите Господа, вси ангели Его.

2. Благословите Господа, вся силы Его.

1. Поклонитеся Ему вси ангели Его.

2. Седяй на Херувимех явися.

1. Ополчится ангел Господень окрест боящихся Его.

2. Словом Господним небеса утвердишася и духом уст Его вся сила их.

1. И взыде на Херувимы и лете.

2. Кто Бог велий, яко Бог наш. Ты еси Бог, творяй чудеса.

1. Хвалите Господа с небес, хвалите Его в вышних.

2. Хвалите Его вси ангели Его.

1. Хвалите Его вся силы Его.

2. Всякое дыхание да хвалит Господа.

7. Иже во святых отца нашего Иоанна, архиепископа Новгородского

Величание

Величаем тя, святителю отче Иоанне, чуду знамения Пресвятыя Богородицы послужившаго и о великом Нове-Граде и о всей Русской земле Бога непрестанно молящегося.

Псалом общий святителю:

Священницы Твои облекутся правдою.

9. Святых и праведных Богоотцев Иоакима и Анны

Величание

Величаем вас, святии праведнии Богоотцы Иоакиме и Анно, и чтим святую память вашу, вы молите за нас Христа Бога нашего.

Псалом

1. Радуйтеся, праведники, о Господе: правым подобает похвала.

2. Тебе ради претерпех поношение, покры срамота лице мое.

1. Птица обрете себе храмину и горлица гнездо себе, идеже положит птенцы своя.

2. Господи Боже сил, услыши молитву мою, внуши, Боже Иаковль.

1. Услыши молитву мою, Господи, и моление мое внуши, слез моих не премолчи.

2. Господи Боже мой, щедрый и милостивый, призри на мя и помилуй мя.

1. Сотвори со мною знамение во благо, да видят, яко Ты, Господи,утешил мя еси.

2. Близ Господь всем призывающим Его.

1. Не возвратится смиренный посрамлен.

2. Услыша Господь глас плача моего, услыша Господь моление мое, Господь молитву мою прият.

1. Обратил еси плач мой в радость мне.

2. Кто яко Господь Бог наш, на смиренных призираяй, вселяя неплодовь в дом, материю, о чадех веселящеюся.

1. Вниду в дом Твой со всесожжением, воздам Тебе молитвы моя, яже изрекосте устне мои в скорби моей.

2. Праведницы возвеселятся, возрадуются пред Богом, насладятся в веселии.

10. Преподобнаго и благовернаго князя Андрея, во иноцех Иоасафа, Спасокубенскаго.

Величание

Ублажаем тя, преподобне и благоверне княже Иоасафе, и чтим святую память твою, наставниче монахов и собеседниче ангелов.

Псалом

1. Князи и юноши да восхвалят имя Господне.

2. Ты еси упование мое от юности моея.

1. Юнейший есмь аз, оправданий Твоих не забых.

2. Сотворити волю Твою, Боже мой, восхотех.

1. В чесом исправит юнейший путь свой? Внегда сохранити словеса Твоя.

2. Паче старец разумех, яко заповеди Твоя взысках.

1. Коль сладка гортани моему словеса Твоя, паче меда устом моим.

2. Вниду к жертвеннику Божию, к Богу веселящему юность мою.

1. Се, удалихся, бегая, и водворихся в пустыни, чаях Бога спасающаго мя от малодушия и от бури.

2. Покрых постом душу мою.

1. Воззвах к Тебе, Господи, весь день, воздех к Тебе руце мои.

2. Во дни воззвах и в нощи пред Тобою, да внидет пред Тя молитва моя.

1. Господь не оставит преподобных Своих, во век сохранятся.

2. Хвалите, Господа князие, пойте Господеви преподобнии Его.

11. Преподобных и богоносных отец наших Сергия и Германа, Валаамских чудотворцев

Величание

Ублажаем вас, преподобнии отцы Сергие и Германе Валаамские, и чтим святую память вашу, наставницы монахов и собеседницы ангелов.

Псалом преподобным подвизавшимся на островах:

Господь воцарися, да веселятся острови.

13. Обновление во Иерусалиме храма Святаго Воскресения Христа и Бога нашего

Величание

Величаем Тя, Живодавче Христе, нас ради во гробе, яко мертва, положеннаго и со славою тридневно воскресшаго.

Псалом

Воскликните Господеви вся земля, пойте же имени Его.

Да воскреснет Бог и расточатся врази Его.

Воста, яко спя, Господь, яко силен и порази врагов своих.

Воскресни Господи гневом Твоим, вознесися в концах врагов Твоих.

Страсти ради ниших и воздыхания убогих ныне воскресну, глаголет Господь.

Воскресни Господи, помози нам и избави нас имене ради Твоего.

Воскресни Господи Боже мой, да вознесется рука Твоя, не забуди убогих Твоих до конца.

Воскресни Господи, спаси мя Боже мой.

Господь воцарися, в лепоту облечеся.

Воцарится Господь во век, Бог Твой, Сионе, в род и род.

Воскресни, Боже, суди земли, яко Ты наследиши во всех языцех.

Рцыте во языцех, яко Господь воцарися.

Вси языцы восплещите руками, воскликните Богу гласом радования.

Вся земля да поклонится Тебе и поет Тебе, да поет же имени Твоему Вышний.

16. Святой благоверной Людмилы княгини Чешской

Величание

Величаем тя, святая благоверная княгине Людмило, и чтим мученическую Христа ради кончину твою.

Псалом

1. Предзрех Господа предо мною, яко одесную мене есть.

2. Прилепихся свидениям Твоим, Господи.

1. Десница Господня вознесе мя.

2. Возлюбих заповеди Твоя паче злата и топазия.

1. Судьбы Господни вожделенны паче злата и камене честна многа и слаждша паче меда и сота.

2. Ко всем заповедем Твоим направляхся, всяк путь неправды возненавидех.

1. Мене ждаша грешницы погубити мя, свидения Твоя разумех.

2. Законопреступницы восташа на мя, и не предложиша Тебе пред собою.

1. Ближнии мои отдалече мене сташа и нуждахуся ищушии душу мою.

2. Положиша на мя злая за благая, и ненависть за возлюбление мое.

1. Готово сердце мое, Боже, готово сердце мое.

2. Тебе ради умерщвляемся, вменихомся яко овцы заколения.

1. Сеющии слезами, радостию пожнут.

2. Дивен Бог во святых Своих, Той даст силу и державу людем Своим.

17. Святых мучениц Софии и триех ея дщерей Веры, Надежды и Любве

Величание

Величаем вас, святии мученицы Софие, Веро, Надеждо и Любве, и чтим честныя страдания ваша, в них же вы соименныя вам добродетели мужественно исповедаете.

Иное величание

Величаем вас святии мученицы Софие, Веро, Надеждо и Любовь и чтим святую память вашу, вы бо молите о укреплении и в нас совместных вам добродетелей¹

Псалом

1. Начало премудрости страх Господень.

2. Се аз и дети, их же ми дал есть Бог.

1. Веровах, темже возглаголах.

2. Верую видети благая Господня на земли живых.

1. Благо есть надеятися на Господа.

2. Надеющиися на Господа, яко гора Сион.

1. Возлюблю Тя, Господи, крепосте моя.

2. Похвалятся о Тебе вси любящии имя Твое.

1. Приведутся Царю девы, приведутся в веселии и радовании.

2. Глаголах о свидениях Твоих пред царями и не стыдятся.

1. Искусил яси ны, Боже, разжегл еси ны, якоже разжизается сребро.

2. Тебе ради умерщвляемся, вменихомся, яко овцы заколения.

1. Возрадовашася дщери иудейския судеб ради Твоих, Господи.

2. Дивен Бог во святых Своих, Бог Израилев.

19. Преподобнаго благовернаго князя Феодора Смоленскаго и чад его,благоверных князей Давида и Константина, Ярославских чудотворцев.

Величание

Величаем вас, святии благовернии князие Феодоре, Давиде и Константине, и чтим труды и подвиги ваши, их же вы во славу Христа Бога и во устроение земли вашея совершисте.

Псалом

1. Блажен муж бояйся Господа, сильно на земли будет семя его.

2. Закон Бога его в сердце его и не запнутся стопы его.

1. Род правых благословится.

2. Поставиши их князьями по всей земли.

1. Князи людстии собрашася с Богом Авраамлим.

2. Божии державнии земли зело вознесошася.

1. Раб твой есмь аз, вразуми мя.

2. Держава Господь боящихся Его.

1. Бысть Господь утверждение мое.

2. О Бозе спасение мое и слава моя.

1. В руках Твоих жребии мои, избави мя из руки врагов моих и от гонящих мя.

2. Мнози изгонящии мя и стужающии ми.

1. Внегда скорбети ми, призвах Господа и к Богу моему воззвах.

2. Хвалите Господа, князие, пойте Господеви преподобнии Его.

20. Святаго великомученика Евстафия Плакиды и дружины его

Величание

Величаем тя, страстотерпче святый Евстафие, и чтим скорби твои о разлучении с близкими и честныя страдания, их же за Христа претерпел еси.

Псалом

1. Бог нам прибежище и сила, помощник в скорбех. обретших нас зело.

2. Господь испытает праведнаго.

1. Скорби сердца моего умножишася.

2. В день скорби моея Бога взысках.

1. Ко Господу, внегда скорбети ми, воззвах и услыша мя.

2. Явил ми еси скорби многи и злы, и обращься утешил мя еси.

1. Обратил еси плач мой в радость мне.

2. Глаголах о свидениих Твоих пред царями и не стыдяхся.

1. Мене ждаша грешницы погубити мя, свидения Твоя разумех.

2. Языцы обыдоша мя, и именем Господним противляхся им.

1. Аз на раны готов, и бых язвен весь день.

2. Тебе ради умершвляемся весь день; вменихомся, яко овцы заколения.

1. Господь утверждение мое, и прибежище мое, и избавитель мой, Бог мой, помощник мой, и уповаю на Него.

2. Святым, иже суть на земли Его, удиви Господь вся хотения Своя в них.

20. Святых мучеников и исповедников великаго князя Михаила и болярина его Феодора, Черниговских чудотворцев

Величание

Величаем вас, страстотерпцы святии и исповедницы, благоверный великий княже Михаиле и болярине Феодоре, и чтим честная страдания ваша, ихже вы за Христа претерпесте.

Псалом общий князю мученику, пострадавшему от неверных:

Бог нам прибежище и сила.

20. Преподобнаго и благовернаго князя Олега, в иноцех Леонтия, Брянскаго чудотворца

Величание и псалом, общие князю иноку

21. Иже во святых отца нашего Димитрия, митрополита Ростовскаго

Величание

Величаем тя, святителю отче Димитрие, житий святых списателю и к подражанию вере и подвигам их наставниче.

Псалом

1. Священницы Твои облекутся правдою и преподобнии Твои возрадуются.

2. Молитвы моя Господеви воздам пред всеми людьми Его.

1. Повем имя Твое братии моей, посреде церкви воспою Тя.

2. Провещает язык мой словеса Твоя.

1. Уста моя возглаголют премудрость и поучение сердца моего разум.

2. Помыслих дни первыя и лета вечная помянух и поучахся.

1. Отцы наши поведаша, возвещающе хвалы Господни, и силы Его и чудеса Его, яже сотвори, сказати о них сыновом своим.

2. Мне же зело честни быша друзи Твои, Боже.

1. Изочту их, и паче песка умножатся.

2. Дивен Бог во святых Своих.

1. Да напишется сие в род ин.

2. Милости Твоя, Господи, в век воспою, в род и род возвещу истину Твою.

1. Да познает род ин, сынове родящиися, и поведят о них сыновом своим.

2. Пойте Господеви, преподобнии Его, исповедайте память святыни Его, во всех людех чудеса Его.

23. Зачатие честнаго славнаго пророка, Предтечи и Крестителя Господня Иоанна

Величание

Величаем вас, святии праведнии Захарие и Елисавето, и чтим прозябшаго от вас, в рожденных пречестнейшаго, Предтечу и Крестителя Господня Иоанна.

Псалом родителям Предтечи (5 сентября):

Веселитеся о Господе и радуйтеся праведнии.

25. Преподобнаго и Богоноснаго отца нашего Сергия, игумена в Маковце Живоначальныя Троицы, Радонежскаго и всея России чудотворца

Величание

Ублажаем тя, преподобне отче Сергие, взбраннаго воеводу и игумена всея Руси, скораго нашего помощника и преславнаго чудотворца.

Псалом

1. Пойте Господеви, преподобнии его. Исповедайте память святыни Его, во всех людех чудеса Его.

2. В Тебе утвердихся от утробы, от чрева матере моея.

1. Имже образом желает елень на источники водныя, сице возжада душа моя к Богу.

2. Се, удалихся, бегая, и водворихся в пустыни, чаях Бога, спасающего мя.

1. Уподобихся неясыти пустынней, бдех и бых, яко птица особящаяся.

2. Господь просвещение мое и Спаситель мой, кого убоюся.

1. Аз яко маслина плодовита в дому Божии.

2. Насаждени в дому Господни во дворех Бога нашего процветут.

1. Праведник, яко финикс процветает, и яко кедр, иже в Ливане, умножится.

2. Будет, яко древо, насажденное при исходищих вод, еже плод свой даст во время свое.

1. Приидите, чада, послушайте мене, страху Господню научу вас.

2. Честна пред Господем смерть преподобных Его.

1. Господь не оставит преподобных Своих: во век сохранятся.

2. Слава сия будет всем преподобным Его.

25. Иже во святых отца нашего Германа, архиепископа Казанскаго

Величание

Величаем тя, святителю отче Германе, и чтим равноапостольные труды твоя, имиже во граде Казани трудился еси, во благовестии Христове.

Псалом общий святителю равноапостольному:

Воскликните Богови вся земля.

25. Преподобной и благоверной княжны Евфросинии Суздальской

Величание

Ублажаем тя, преподобная и благоверная княжна Евфросиние, и чтим святую память твою, ты бо молиши за нас Христа Бога нашего.

Псалом преподобной деве:

Приведутся Царю девы, приведутся в веселии и радовании, введутся в храм Царев.

26. Святаго славнаго и всехвальнаго апостола и евангелиста Иоанна

Богослова

Величание

Величаем тя, апостоле и евангелисте Иоанне Богослове, любви преисполненнаго и Христом возлюбленнаго, неизглаголанной премудрости учения возгремевшаго вселенной.

Псалом

1. Возлюблю Тя, Господи, крепосте моя.

2. Готово сердце мое, Боже, готово сердце мое.

1. Возжада Тебе душа моя.

2. Прильне душа моя по Тебе, мене же прият десница Твоя.

1. Исчезе сердце мое и плоть моя: Боже сердца моего, и часть моя, Боже, во век.

2. Искусил еси сердце мое, искусил мя еси и не обретеся во мне неправда.

1. Сердце чисто созижди во мне, Боже.

2. Безвестная и тайная премудрости Твоея явил ми еси.

1. Согреяся сердце мое и в поучении моем разгорится огнь.

2. Глас даша облацы, глас грома Твоего, осветиша молния Твоя вселенную.

1. Возвестите во языцех славу Его, во всех людех чудеса Его.

2. Услышите сия вси языцы, внушите вси живущии по вселенней.

1. Во всю землю изыде вещание их и в концы вселенной глаголы их.

2. Долготою дний исполню его и явлю ему спасение Мое.

27. Преподобнаго и богоноснаго отца нашего Савватия Соловецкаго

Величание общее преподобным

Псалом преподобным, подвизаюшимся на островах:

Господь воцарися, да веселятся острова.

28. Собор преподобных отец Киево-Печерских, в ближних пещерах почивающих

Величание и псалом всем преподобным Киево-Печерским в неделю

2-ю Святыя Четыредесятницы:

Соберите Ему преподобных Его.

28. Святаго благовернаго князя Вячеслава Чешскаго

Величание и псалом общие князю мученику, пострадавшему от близких:

Вознесох избраннаго от людей Моих.

30. Святаго священномученика Григория, просветителя Великой Армении

Величание

Величаем тя, священномучениче Григорие, и чтим равноапостольныя труды твоя, имиже во Армении трудился еси во благовестии Христове.

Псалом

1. Бог богов Господь глагола и призва землю.

2. Рцыте во языцех, яко Господь воцарися.

1. Воцарится Бог над языки.

2. Возвестите во языцех славу Его, во всех людех чудеса Его.

1. Господь даст глагол благовествующим силою многою.

2. Исповемся Тебе во языцех, Господи.

1. Приидите, чада, послушайте мене, страху Господню научу вас.

2. Истину Твою и спасение Твое рех.

1. Глаголах о свидениих Твоих пред царями и не стыдяхся.

2. Аше и пойду посреде сени смертныя, не убоюся зла, яко Ты со мною еси.

1. Положиша мя в рове преисподнем.

2. Да не пожрет мене глубина, да не сведет о мне ровенник уст своих.

1. Терпя потерпех Господа, и внят ми, и услыша молитву мою, и возведе мя от рова страстей и от брения тины.

2. Ты, Господи, сохраниши нас и соблюдеши нас от рода сего и во век.

30. Иже во святых отца нашего Михаила, перваго митрополита Киевскаго

Величание

Величаем тя, святителю отче Михаиле, отцев наших святым крещением просветившаго и о нас, чадех их, всегда тепле молящагося.

Псалом

1. Воскликните Богови вся земля.

2. Бог богов Господь глагола и призва землю.

1. От восток солнца до запад хвально имя Господне.

2. Будет утверждение на земли, на версех гор.

1. Знаменася на нас свет лица Твоего, Господи.

2. По всей земли слава Твоя.

1. Священницы Твои облекутся правдою.

2. Молитвы моя Господеви воздам пред всеми людьми Его, во дворех дому Господня.

1. Господь даст глагол благовествующим силою многою.

2. Приидите, чада, послушайте мене, страху Господню научу вас.

1. Повем имя Твое братии моей.

2. Истину Твою и спасение Твое рех.

1. Боже сил, призри с небесе и виждь, и посети виноград сей и соверши и, егоже насади десница Твоя.

2. Укрепи, Боже, сие, еже соделал еси в нас.